“Toyota” şirkəti 1 milyondan çox avtomobili geri çağırır

“Toyota Motor” avtomobil konserni Yaponiyada təxminən 1,28 milyondan çox avtomobili geri çağırır. Kütləvi geri çağırma əməliyyatına səbəb panoramik görüntünü idarə edən proqram təminatında yaranan nasazlıqdır. Yaponiyanın Nəqliyyat Nazirliyi bu barədə məlumat verib.

Şirkət bu addımı atmağa məcbur qalıb, çünki proqram təminatındakı xəta səbəbindən avtomobilin ekranında düzgün olmayan təsvirlər görünə bilər. Söhbət avtomobillərdə quraşdırılmış kameraların görüntülərini displeylərə çıxaran panoramik görüntü proqram təminatından gedir. "Toyota" müəyyənləşdirib ki, bu problem sürücünün ətrafı görmə qabiliyyətinə mənfi təsir göstərə bilər.

Geri çağırış sentyabr 2021-ci ildən 2025-ci ilədək istehsal olunmuş 42 müxtəlif modelə aiddir. Qeyd olunur ki, həmin proqram təminatının işləməsində 26 nasazlıq halı qeydə alınmışdır. Lakin ən vacib məqam budur ki, bu problemlər indiyə qədər heç bir yol-nəqliyyat hadisəsinə səbəb olmayıb. Şirkət indi proqram təminatındakı xətanı düzəltmək üçün zəruri yenilənmələri həyata keçirəcək.