TİKA sədri: Qarşıdakı dövrdə də Azərbaycanın səhiyyə infrastrukturuna töhfə verəcəyik

Türkiyə İqtisadi İnkişaf Agentliyinin (TİKA) sədri Abdullah Eren Azərbaycanın səhiyyə naziri Teymur Musayevlə görüş keçirib. TİKA sədri görüşlə bağlı məlumatı özünün "X" sosial media platformasında yayıb.

Abdullah Eren bildirib ki, "Can Azərbaycanın" səhiyyə naziri Teymur Musayevlə görüş zamanı TİKA-nın ölkədəki fəaliyyətləri haqqında hərtərəfli məsləhətləşmələr aparılıb. Görüşün əsas mövzusu agentliyin Azərbaycanda həyata keçirdiyi layihələrin müzakirəsi olub.

A. Eren TİKA-nın gələcək planları barədə də danışıb. O qeyd edib ki, TİKA qarşıdakı dövrdə də Azərbaycanın səhiyyə infrastrukturuna töhfə verməyə davam edəcək. Qurum layihələrini eyni qətiyyətlə və ardıcıllıqla davam etdirmək niyyətindədir. Bu addımlar Türkiyə və Azərbaycan arasındakı əməkdaşlığın gücləndiyini göstərir.