TİKA rəsmisi: TDT ölkələri QHT-lərinin təcrübə mübadiləsi əlaqələri daha da möhkəmləndirəcək

Türk Dövlətləri Təşkilatına (TDT) üzv ölkələrin QHT-lərinin təcrübə mübadiləsi əlaqələri daha da möhkəmləndirəcək. Bu sözləri TİKA Bakı Ofisinin rəhbəri Hayrettin Çelik Həmrəylik Forumunda deyib. Çelik TİKA-nın beynəlxalq fəaliyyət dairəsi barədə geniş məlumat verib. Qurum yarandığı gündən bəri 170-dən artıq ölkədə 30 mindən çox layihə və iş həyata keçirib. TİKA-nın əsas missiyası Türkiyənin beynəlxalq inkişaf əməkdaşlığı çərçivəsində ölkələrin iqtisadi, sosial və humanitar inkişaf prosesini dəstəkləməkdir.

Bu fəaliyyətə ortaq tarixi və mədəni irsi gələcəyə daşıyan davamlı layihələrin həyata keçirilməsi daxildir. Bakı ofisi də bu missiyaya uyğun işləyir. O, dayanıqlı əməkdaşlıq məqsədilə 2 minə yaxın layihəyə imza atıb. Hayrettin Çelik qeyd edib ki, TİKA Türk dövlətləri ilə qardaşlıq əlaqələrini bir çox sahədə gücləndirir. Bu sahələrə təhsildən səhiyyəyə, potensialın artırılmasından tutmuş mədəni irsin qorunmasına qədər müxtəlif istiqamətlər daxildir. Bu layihələr vasitəsilə Türk xalqının birliyi dünyanın fərqli bölgələrinə çatdırılır.

H. Çelik sivil cəmiyyətin müasir dövlətlərin əsas dayaqlarından biri olduğunu bildirib. O hesab edir ki, təşkilatlar ortaq irsin araşdırılması və müasir təcrübələrin paylaşılması istiqamətində işləməyə davam etməlidir. O, forumda iştirak edən qonaqların öz QHT təcrübələrini bir-biri ilə bölüşəcəklərinə inandığını söyləyib. Bu mübadilə aradakı dostluq bağlarını daha da möhkəmlətməyə kömək edəcəkdir. Bu tipli əməkdaşlıq Türk Dövlətləri Təşkilatı çərçivəsində əlaqələrin inkişafı üçün böyük əhəmiyyət daşıyır.