Texnoloji inkişaf olmadan kibertəhlükələrlə mübarizə aparmaq mümkün deyil - DİN rəsmisi

Daxili İşlər Nazirliyinin (DİN) Baş İnformasiya və Kommunikasiya İdarəsinin rəhbəri Hikmət Məmmədov kibertəhlükəsizliklə bağlı ciddi xəbərdarlıq edib. Məmmədov bu gün Bakıda keçirilən "2-ci Beynəlxalq Caspian Innovation Forum”unda çıxış edərkən, köhnə üsullarla müasir hücumların qarşısını almağın artıq mümkünsüz olduğunu bildirib.

DİN rəsmisi vurğulayıb ki, texnoloji inkişaf olmadan kibertəhlükələrlə mübarizə aparıla bilməz. O qeyd edib ki, klassik IT təhlükəsizlik sistemi artıq işlək deyil. İmza əsaslı köhnə təhlükəsizlik sistemləri yeni nəsil kibertəhdidlərə cavab verə bilmir. Bu təhdidlər süni intellektlə gücləndirilib, tamamilə avtomatlaşdırılıb və ən əsası, insan psixologiyasını manipulyasiya etmək qabiliyyətinə malikdir. Belə mürəkkəb hücumlarla mübarizə etmək üçün ölkə texnoloji infrastruktur qurur.

Hikmət Məmmədov kiberdavamlılıq konsepsiyasına diqqət çəkib. O deyib ki, hər bir şəxs və ya qurum hücuma məruz qala bilər. Bəzi hallarda hücumun baş verdiyini hiss etmək belə mümkün olmaya bilər. Əsas məqsəd hücum edildiyi təqdirdə belə, göstərilən xidmətlərin davam etməsidir. Beləliklə, DİN rəsmisi xidmətlərin kiberdavamlılıq səviyyəsinin yüksək olacağını və fasiləsiz işləyəcəyini qeyd edib.