"Halliburton": Artıq ənənəvi üsullarla yüksək nəticələr əldə etmək mümkün deyil

Artıq neft-qaz sənayesində ənənəvi üsullarla yüksək nəticələr qazanmaq mümkün deyil. "Report" xəbər verir ki, "Halliburton" şirkətinin Şərqi Yarımkürə üzrə Prezidenti Şannon Slokum Bakıda keçirilən "SPE Xəzər Texniki Konfransı"nda bu barədə danışıb.

Slokumun sözlərinə görə, süni intellekt (AI) neft sənayesini yeni bir mərhələyə çatdırır. Neft-qaz sənayesi son onilliklərdə böyük bir texnoloji transformasiya yaşayır. O qeyd edib ki, hazırda müştərilər 16 kilometrdən artıq uzunluğa malik quyuları tam avtonom şəkildə, heç bir müdaxilə olmadan qazmağı bacarırlar. Bu nailiyyət yalnız qazma sürəti baxımından deyil, həm də yatağın keyfiyyətini dəqiqliklə müəyyən etmək üçün böyük əhəmiyyət daşıyır. Şirkət rəsmisi bildirib ki, geofiziklər əvvəllər bir ölçülü modellərlə uzun müddət işləyirdilər, ancaq indi vəziyyət fərqlidir.

Hal-hazırda 3D və 4D modellər real vaxtda yenilənir. Qazma avadanlığı 100 fut irəlini görə bilir, modellər saniyələr içində dəyişir və qərarlar avtomatik verilir. Şannon Slokum vurğulayıb ki, süni intellekt və avtomatlaşdırma yaxın illərdə sənayenin inkişafında həlledici rol oynayacaq. İndiki texnologiya qazma prosesi zamanı yaranan yükü, vibrasiyanı, ROE (Return on Equity - müəssisənin ümumi kapitalından istifadə edərək əldə etdiyi mənfəəti göstərən əmsal) göstəricilərini və başqa parametrləri analiz edir.

Bu analizlərə əsaslanaraq, sistemlər avtonom qərarlar verir. Bu sistem sənayenin keçdiyi inkişaf yolunun açıq göstəricisidir. Şirkət prezidenti qeyd edib ki, gələcəkdə süni intellekt bu sahədə daha böyük irəliləyişlərə səbəb olacaq.