Sahil Babayev: "Bələdiyyələrin subvensiya və subsidiya vəsaitlərindən istifadə çox aşağıdır"

Maliyyə naziri Sahil Babayev Azərbaycandakı bələdiyyələrin ayrılmış vəsaitləri necə xərclədiyi barədə məlumat verib. Nazir Milli Məclisin Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, İnsan hüquqları, Regional məsələlər komitələrinin birgə iclasında danışırdı. O qeyd edib ki, bələdiyyələrə dotasiya, subsidiya və subvensiyalar ayrılsa da, bu pulların istifadə səviyyəsi çox aşağıdır.

Nazir bildirib ki, bələdiyyələrə ayrılan subvensiya və subsidiya vəsaitlərinin mənimsənilməsi olduqca azdır. Dotasiyaların istifadəsi cari il üzrə qənaətbəxş səviyyədə olsa da, subvensiya və subsidiya istifadəsi çox aşağıdır. Bu ilin 9 ayı üzrə bu göstərici cəmi 50 % təşkil edib. Bu az istifadə səbəbindən Maliyyə Nazirliyi növbəti il üçün bu vəsaitlərin artırılmasını nəzərdə tutmur.