Rusiya XİN başçısının müavini: NATO təlimlərdə Kalininqradın mühasirəsi ssenarisini məşq edir

Şimali Atlantika Alyansı (NATO) hazırda keçirdiyi təlimlər çərçivəsində Rusiyanın Kalininqrad vilayətinin mühasirəsi ssenarisini məşq edir.

Bu barədə Rusiya xarici işlər nazirinin müavini Aleksandr Qruşko "İzvestiya" nəşrinə verdiyi müsahibədə məlumat verib. Qruşkonun sözlərinə görə, Baltikyanı region koalisiya qüvvə və vasitələrinin artırılması səbəbindən aktiv şəkildə militarizasiyaya məruz qalır. Diplomat, əvvəllər Baltik dənizinin əməkdaşlıq məkanı olduğunu, lakin hazırda NATO-nun fəaliyyətləri nəticəsində qarşıdurma zonasına çevrildiyini vurğulayıb. Rusiya bu hərbi hazırlıqları özünün təhlükəsizliyinə birbaşa təhdid kimi qiymətləndirir.

Nazir müavini həmçinin Alyansın bu il başladığı "Baltik keşikçisi" missiyasının məqsədlərinə də toxunub. O qeyd edib ki, bu missiya vasitəsilə NATO həmin akvatoriyada öz gəmiçilik qaydalarını müəyyən etməyə çalışır. Bundan əlavə, Alyans Rusiyanın maraqları naminə həyata keçirilən dəniz yük daşımalarını nəzarət altına almağa və məhdudlaşdırmağa cəhd göstərir. Bu cür addımlar regionda gərginliyi yüksəldən və dəniz yollarında sərbəst hərəkəti məhdudlaşdıran amillərdir.