Politico: Mask Vensin ABŞ-nin növbəti prezidenti olacağına inanır

Amerikalı milyarder İlon Mask keçmiş həmkarlarına bildirib ki, o, ABŞ-ın hazırkı vitse-prezidenti Ceyms Devid Vensin növbəti Ağ Ev rəhbəri olacağına inanır. Amerikanın "Politico" qəzeti bu barədə məlumat yayıb. Qeyd olunur ki, Mask bu inamını noyabrın 22-də ABŞ Hökumətinin Səmərəliliyi İdarəsinin (DOGE) əməkdaşlarına videozəng zamanı ifadə edib.

Mask faktiki olaraq hazırkı ABŞ prezidenti Donald Trampın yaxın çevrəsinin üzvü olub. Bu çıxış zamanı Mask ABŞ-ın "böyük 12 illik dövrün" başlanğıcında olduğunu vurğulayıb. Nəşr bu dövrün nəyi əhatə etdiyini aydınlaşdırır: bu, Trampın indiki dörd illik prezidentlik müddətinə, eləcə də Vensin sonrakı iki belə müddətinə aiddir. Qəzetin yazdığına görə, Mask və Vens yaxşı münasibətlər qurublar. ABŞ-da növbəti prezident seçkiləri 2028-ci ildə keçiriləcək.

Donald Trampın yenidən dövlət başçısı seçilməsi mümkün deyil, çünki ABŞ Konstitusiyasına edilən 22-ci düzəliş bir prezidentin səlahiyyət müddətini iki müddətlə məhdudlaşdırır. Vens hələlik prezidentliyə namizədliyini irəli sürmək planlarını qəti şəkildə açıqlamayıb. Mask həmçinin şəxsi təhlükəsizliyi ilə bağlı narahatlığını dilə gətirib. O, Tramp və Venslə birlikdə ABŞ-da "əsas sui-qəsd hədəfləri" arasında olduğuna əminliyini ifadə edib.