Perinatal mərkəzdəki yanğınla bağlı məhkəmədə: Körpələr "Semaşko"ya köçürüldükdən sonra mərkəzin əməkdaşları ora buraxılmayıb

Bakı Ağır Cinayətlər Məhkəməsində Respublika Perinatal Mərkəzində baş vermiş yanğınla bağlı məhkəmə prosesi davam edir. Hakim Leyla Əsgərova-Məmmədovanın sədrliyi ilə keçirilən iclasda müdafiə tərəfi mühüm bir iddia irəli sürüb. Mərkəzin sabiq direktoru Mehriban Abasquliyevanın vəkili bildirib ki, hadisədən sonra körpələr "Semaşko"ya köçürüldükdən sonra mərkəzin əməkdaşları həmin xəstəxanaya buraxılmayıb. Vəkil bu məsələni aydınlaşdırmaq üçün üç əməkdaşın dindirilməsini istəyib, lakin məhkəmə bu vəsatəti baxılmamış saxladı. Prosesdə təqsirləndirilən şəxslər Mehriban Abasquliyeva ilə yanaşı, sabiq şöbə rəisləri Hamlet Mustafayev və Elnur Əhmədli də iştirak edir.

Məhkəmə iclasında Fövqəladə Hallar Nazirliyinin Dövlət Yanğından Mühafizə Xidmətinin eksperti Tural Süleymanov şahid qismində ifadə verdi. O, yanğın söndürüldükdən təxminən bir saat sonra hadisə yerinə dəvət olunduğunu və baxış keçirərək akt tərtib etdiklərini söylədi. Ekspert izah etdi ki, yanğının başladığı yer kömürləşmənin ən çox olduğu yerdə müəyyən edildi. Aparılan tədqiqatlar, həmçinin videoya baxış nəticəsində yanğının qəzalı vəziyyətdə olan bir uzadıcıdan başladığı dəqiq bilindi. Süleymanov yanğın baş verən mərtəbədən ümumilikdə 4-5 ədəd uzadıcı, elektrik cihazları və küvəzi götürərək laboratoriyaya təqdim etdiklərini əlavə etdi. Elektrik naqillərinin hamısı yanaraq kömürləşmişdi.

Ekspertin ifadəsinə görə, yanğının qısa müddətdə qarşısının alınmaması təhlükəsizlik qaydalarının pozulması ilə bağlı idi. Hadisə yerinə baxış keçirilən zaman məlum olub ki, mərkəzdə quraşdırılmış daxili yanğın su kranları işlək vəziyyətdə olmayıb. Yanğından mühafizə xidməti bu çatışmazlıqla bağlı ayrıca bir akt tərtib edib. Yanğın keçən il yanvarın 9-da baş vermişdi. Bu dəhşətli hadisə nəticəsində 7 yeni doğulmuş körpə ölmüşdü, 4 nəfər xəsarət almışdı. Müəssisəyə dəyən ümumi maddi ziyan isə 361 min manat təşkil edib.

Mərkəzin keçmiş direktoru Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (ehtiyatsızlıqdan iki və daha çox şəxsin ölümünə səbəb olan yanğın təhlükəsizliyi qaydalarını pozma) maddələri ilə təqsirləndirilir. Digər məsul şəxslər Hamlet Mustafayev və Elnur Əhmədli yalnız 225.3-cü maddəsi ilə ittiham olunurlar. Məhkəmə iclasında bir şahid barəsində məcburi gətirilmə qərarı çıxarıldı. Cinayət işi üzrə növbəti məhkəmə iclası dekabrın 15-nə təyin edilib.