Naxçıvanda bir sıra dövlət orqanlarının qurumlarının mətbuat xidmətlərinin nümayəndələri üçün təlim keçilib (FOTO)

Bakı. Trend:

Medianın İnkişafı Agentliyi (MİA) və Naxçıvan Təlim Mərkəzi Naxçıvan Muxtar Respublikasında fəaliyyət göstərən dövlət orqanlarının mətbuat xidmətləri nümayəndələri üçün birgə təlim təşkil edib. Bu təlim 2025-ci il noyabrın 5-də baş tutdu. MİA-nın Naxçıvan regional idarəsinin müdiri Vəfa İsgəndərova açılış mərasimindəki çıxışı zamanı informasiya və kommunikasiya mühitinin dəyişdiyini vurğuladı. O bildirdi ki, dövlət qurumlarının mətbuat xidmətləri ictimaiyyətin operativ və etibarlı məlumatlandırılması üçün əsas institusional funksiyanı yerinə yetirir. İsgəndərova qeyd etdi ki, bu cür peşəkar təlimlərin təşkili ictimaiyyətlə əlaqələr mütəxəssisləri və media nümayəndələri arasında əməkdaşlığı dərinləşdirməyə, kommunikasiya proseslərinin səmərəliliyini artırmağa və informasiya mübadiləsinin dayanıqlı əsaslar üzərində formalaşmasına böyük töhfə verir.

Naxçıvan Təlim Mərkəzinin İdarə Heyətinin sədri Bəhruz Nəzərov isə çıxışında müasir informasiya cəmiyyətində dövlət qurumlarının mətbuat xidmətlərinin sağlam ictimai rəyin formalaşmasında həlledici rola malik olduğunu bildirdi. O əlavə etdi ki, mətbuat xidmətlərinin səmərəliliyini yüksəltmək, informasiya axınını koordinasiyalı təşkil etmək və böhran vəziyyətlərində çevik reaksiya qabiliyyətini artırmaq baxımından belə təlimlər xüsusi əhəmiyyət daşıyır. MİA-nın Kommunikasiya şöbəsinin müdiri Səidə Şəfiyeva təqdimatında "Strateji kommunikasiya yanaşmaları və böhran dövrlərində effektiv idarəetmə" mövzusunu işıqlandırdı. Şəfiyeva sürətlə dəyişən informasiya mühitində sistemli kommunikasiya strategiyasının formalaşdırılmasının vacibliyini qeyd etdi. O vurğuladı ki, düzgün qurulmuş kommunikasiya modeli təkcə məlumatları operativ çatdırmır, həm də ictimai etimadın möhkəmləndirilməsini və institusional reputasiyanın qorunmasını təmin edir.

Tədbirdə hüquqi tənzimlənməyə dair məsələlər də müzakirə olundu. MİA-nın Hüquq şöbəsinin müdiri Adil Tağıyev "Azərbaycanda media mühitinin hüquqi tənzimlənməsində yeni yanaşmalar" mövzusunda danışaraq ölkədə media qanunvericiliyi sahəsində həyata keçirilən islahatlar barədə ətraflı məlumat verdi. Tağıyev rəsmi məlumatların yayımı zamanı hüquqi tələblərə əməl etməyin vacibliyini xüsusi vurğuladı. Şəxsi məlumatların müdafiəsi və dezinformasiya risklərinin minimuma endirilməsi media sahəsində hüquqi mədəniyyətin formalaşmasında əhəmiyyətli yer tutur. Təlimin sonunda Vəfa İsgəndərova tərəfindən "Media savadlılığı: informasiyanın etibarlılığının təmin edilməsi və dezinformasiyaya qarşı mübarizədə effektiv yanaşmalar" mövzusunda interaktiv vörkşop keçirildi. Sessiya rəqəmsal mühitdə risklərin idarə edilməsi, məlumat mənbələrinin etibarlılığının yoxlanılması və rəsmi kommunikasiya vərdişlərinin təkmilləşdirilməsi üzrə praktik müzakirələrlə başa çatdı.