Dövlət Vergi Xidmətinin yeni strategiyasının əsas hədəfi diqqətə çatdırılıb

İqtisadiyyat Nazirliyi yanında Dövlət Vergi Xidməti özünün 25 illiyi münasibətilə Şamaxıdakı Tədris Mərkəzində media nümayəndələri üçün iki günlük təlim və müsabiqə təşkil etdi. Bu tədbir "Azərbaycanın vergi sistemi – retrospektiv baxış (2000–2025-ci illər) və gələcək inkişaf strategiyası (2025–2028-ci illər)" mövzusunu əhatə edirdi.

Ölkənin aparıcı media qurumlarının nümayəndələrinin iştirak etdiyi bu tədbirin əsas məqsədi son 25 ildə vergi sistemində həyata keçirilmiş islahatlar, əldə olunmuş nailiyyətlər və qarşıdakı illər üçün müəyyən edilən prioritet istiqamətlər haqqında ətraflı məlumat vermək idi. Təlim çərçivəsində Tədris Mərkəzinin şöbə rəisi İmran Qarayev və Vergi siyasəti baş idarəsinin şöbə rəisi Niyaz Şükürov çıxış etdilər. Onlar 2000–2025-ci illərdə vergi sisteminin institusional inkişaf mərhələlərini izah etdilər.

Təqdimatlarda elektron xidmətlərin formalaşması, vergi inzibatçılığında şəffaflığın və səmərəliliyin artırılması üçün görülən işlər geniş müzakirə olundu. Həmçinin, natiqlər "Dövlət Vergi Xidmətinin 2025–2028-ci illər üzrə Strategiyası"nın əsas hədəfini açıqladılar. Təlim iştirakçıları vergi orqanları ilə media arasında əməkdaşlığın gücləndirilməsi, ictimaiyyətin düzgün məlumatlandırılması, vergi mədəniyyətinin təşviqi mövzularında da fikir mübadiləsi aparıblar.

Bu görüşlər qurumun keçdiyi inkişaf yolunu aydın göstərməklə yanaşı, yeni strateji hədəflər barədə ictimaiyyəti məlumatlandırmağa xidmət edir. Sonda media nümayəndələri arasında təşkil olunan müsabiqə baş tutdu. Qaliblər diplom və hədiyyələrlə mükafatlandırıldılar.