NATO rəqəmsal müdafiənin gücləndirilməsində sənayenin rolunu vurğulayıb

NATO-nun Baş katibi Mark Rutte Brüsseldə keçirilən üçüncü NATO Bulud Konfransında iştirak edib. O, Alyansın rəqəmsal müdafiəsinin möhkəmləndirilməsində sənayenin həlledici rol oynadığını bildirib.

Tədbirdə NATO və tərəfdaş ölkələrdən hökumət, sənaye və akademik dairələri təmsil edən 500-dən çox nümayəndə iştirak edirdi. Rutte, artan qlobal təhdidlər fonunda daha sıx əməkdaşlığın zəruri olduğunu qeyd etdi. Baş katib rəqiblərin süni intellekt və kvant hesablama sahəsindəki irəliləyişlərinə xüsusi diqqət çəkdi. O, üzv ölkələri bulud texnologiyalarının tətbiqini sürətləndirməyə çağırıb. Alyansın gələcək təhlükəsizliyi üçün bu cür texnologiyalar əsas hesab olunur.

Baş katib NATO-nun Bulud və Edge hesablama siyasətinin və "Allied Software for Cloud and Edge Services (Project ACE)” təşəbbüsünün qətiyyətlə icrasının vacibliyini vurğulayıb. Ruttenin sözlərinə görə, bu addım məlumat mübadiləsini sürətləndirəcək və qərarvermə prosesini daha səmərəli edəcək. O, Rusiya hücumları fonunda Ukraynanın bulud sistemlərinə sürətli keçid təcrübəsini müsbət nümunə kimi göstərdi. Baş katib Haaqa Sammitində qəbul edilən qərarları da xatırlatdı. Bu qərarlara əsasən, 2035-ci ilədək ÜDM-in 5 faizinin hərbi xərclərə yönəldilməsi öhdəliyi müəyyən edilmişdi. Bu öhdəlik kibermüdafiə, süni intellekt və bulud texnologiyalarına investisiyaların artırılmasına geniş imkanlar yaradır.

Mark Rutte rəqəmsal suverenliklə bağlı narahatlıqlara da toxunub. O qeyd edib ki, milli nəzarət ilə kollektiv imkanlar arasında düzgün balans tapmaq önəmlidir. Bulud texnologiyaları və “edge computing”in sürət üstünlüyü hərbi sahədə böyük faydalar verir. Baş katib NATO daxilində daha dayanıqlı texnoloji infrastrukturun qurulmasının və müttəfiqlər arasında əməkdaşlığın gücləndirilməsinin zəruri olduğunu bildirib.