MEDİA-da Türkiyənin bir qrup media nümayəndəsi ilə görüş keçirilib - FOTO

Azərbaycan Milli Mətbuatının 150 illik yubileyi və Zəfər Günü münasibətilə ölkəmizə gəlmiş Türkiyənin Qars, Ərzurum və İğdır vilayətlərindən olan bir qrup media nümayəndəsi Medianın İnkişafı Agentliyində (MEDİA) görüş keçirib. Bu heyət səfər çərçivəsində Qarabağa və işğaldan azad edilmiş digər torpaqlara səfər edib. Görüşdə Azərbaycanın bir sıra media subyektlərinin nümayəndələri də iştirak edirdi. Müzakirələrin əsas mövzusu Qarabağda işğal dövründə yaranan dağıntılar və hazırda həyata keçirilən geniş bərpa-quruculuq prosesi olub.

Medianın İnkişafı Agentliyinin İcraçı direktorunun müavini Natiq Məmmədli qonaqlara Qarabağın üzləşdiyi vəziyyət barədə ətraflı məlumat verdi. O vurğuladı ki, bu gün Qarabağa həyatın qayıtması Azərbaycan xalqı üçün həm böyük qürur mənbəyi, həm də tarixi bir hadisədir. Məmmədli bildirdi ki, Prezident İlham Əliyevin rəhbərliyi ilə azad edilmiş ərazilərdə şəhər və kəndlər sürətlə bərpa edilir, müasir yaşayış məntəqələri salınır. O qeyd etdi ki, sosial infrastruktur yenidən qurulur, bölgənin dayanıqlı inkişafı təmin edilir. Bu müstəsna prosesin mediada işıqlandırılması və dünya ictimaiyyətinə çatdırılması xüsusi əhəmiyyət daşıyır. Agentliyin Müşahidə Şurasının sədri Dağbəyi İsmayılov çıxış edərək, Azərbaycan və Türkiyə münasibətlərinin yalnız media sahəsində deyil, bütün istiqamətlərdə ən yüksək səviyyədə olduğunu dedi. O vurğuladı ki, iki ölkə hər zaman bir-birinin yanında olub və bu həmrəyliyin təməlində sarsılmaz qardaşlıq və dostluq dayanır.

Türkiyədən gələn media nümayəndələri öz səfərləri zamanı azad edilmiş ərazilərə baş çəkdiklərini təsdiqlədilər. Onlar bərpa və yenidənqurma işləri ilə yaxından tanış olduqlarını bildirdilər. Jurnalistlər, həmçinin Xocalıda şəhidlərin xatirəsinə ucaldılmış abidəni ziyarət etdiklərini qeyd etdilər. Onlar azad edilmiş torpaqlarda qısa müddətdə gerçəkləşən genişmiqyaslı quruculuq prosesini yüksək qiymətləndiriblər. Media təmsilçiləri, təmsil etdikləri informasiya resurslarında bu prosesin gedişi və əhəmiyyətinin ictimaiyyətə çatdırılması məqsədilə bir sıra reportajlar və analitik materiallar hazırlayacaqlarını vurğuladılar. Türkiyəli jurnalistlərin budəfəki səfəri iki ölkə arasındakı media əlaqələrinin daha da dərinləşməsinə və azad edilmiş ərazilərdə aparılan işlərin beynəlxalq mediada geniş işıqlandırılmasına xidmət edir.