Məcnun Məmmədov: "Əsas məqsəd fermerlərin daha gəlirli sahələrə yönləndirilməsidir"

Əsas məqsəd Azərbaycanlı fermerlərin daha yüksək gəlir gətirən sahələrə yönəlməsinə nail olmaqdır. Bu, ölkədə əkin strukturunun düzəldilməsi vasitəsilə həyata keçirilir. Kənd təsərrüfatı naziri Məcnun Məmmədov "Baku TV"yə müsahibəsində bu barədə danışıb.

Nazirə görə, dünyada baş verən iqlim dəyişiklikləri və onların mənfi təsirlərinə baxmayaraq, aqrar sahədə müşahidə edilən inkişaf böyük uğurdur. O, kənd təsərrüfatında baş verən müsbət dəyişiklikləri birinci qrupa ayırmaq istədiyini bildirib. Məmmədovun qeyd etdiyi ilk nailiyyət infrastrukturla bağlıdır. Hazırda ölkədə kənd təsərrüfatına xidmət edən infrastrukturun yenilənməsi, su kanallarının inşası geniş vüsət almaqdadır.

M. Məmmədov qeyd edib ki, Azərbaycanın kənd təsərrüfatı strukturunda tarixən bir xüsusiyyət olub: ən az əlavə dəyər yaradan bitkilərin əkini üstünlük təşkil edirdi. Hazırkı strategiya bu vəziyyəti dəyişməyə yönəlib. Əsas prioritet, fermerlərin daha yüksək əlavə dəyər yaradan bitkilərin əkilməsinə təşviq edilməsidir. Bu dəyişikliklər artıq əkin strukturunda öz əksini tapır. Nazir bildirib ki, ən az dəyər yaradan bitkilər – taxıl, yem və texniki bitkilər – bizimlə eyni və ya daha kiçik əkin sahəsinə malik ölkələrdə cəmi 50-60 % təşkil edir. Azərbaycanda isə bu göstərici uzun illər boyu 90 %-dən çox olmuşdu. Hazırda həmin rəqəm 86-87 %-ə qədər azalıb.

Nazir əlavə edib ki, hədəf fermerləri daha gəlirli sahələrə istiqamətləndirməklə onların gəlir səviyyəsini artırmaqdır. Əkin strukturunda başlayan dəyişiklik və dinamiklik özlüyündə mühüm nailiyyət sayılır. Bu cür struktur dəyişikliyi fermerlərin gəlir səviyyəsini artırmaq üçün atılan mühüm addımdır.