Leyla Əliyevanın təşəbbüsü ilə uşaq evlərinin komandaları arasında minifutbol turniri təşkil olunub

Oktyabrın 30-da uşaq evlərində yaşayan oğlan və qızlardan ibarət komandalar arasında növbəti "Dostluq Kuboku" minifutbol turniri keçirildi. Yarış 10-11 və 12-13 yaş qruplarını əhatə edirdi. Bu tədbirin əsas məqsədi uşaqların fiziki və psixoloji inkişafına kömək etmək, onlarda komanda ruhunu və sosial bacarıqları gücləndirmək idi.

Turniri Heydər Əliyev Fondunun vitse-prezidenti Leyla Əliyeva, Bakı Media Mərkəzinin rəhbəri Arzu Əliyeva və Alena Əliyeva da izlədi. Azərbaycan Futbol Federasiyaları Assosiasiyasının (AFFA) təşkilatçılığı ilə baş tutan bu yarışda Sosial Xidmətlər Agentliyinin nəzdində fəaliyyət göstərən dörd uşaq evinin komandaları iştirak etdi. Bunlar Bakı şəhər 1, 2, 3 və Gəncə şəhər 4 saylı Uşaq evlərinin kollektivləri idi. Komandalar müvafiq olaraq "Şahinlər", "Birlik", "Zəfər" və "Kəpəz" adları ilə güclərini sınadılar.

Meydanda həm qızlar, həm də oğlanlar yüksək idman əzmi və dostluq münasibəti nümayiş etdirdilər. Oyunlar boyunca həm uşaqların, həm də tamaşaçıların böyük coşqu və sevinc yaşadıqları diqqət çəkdi. Turnirin ən yaddaqalan məqamlarından biri Leyla Əliyeva, Arzu Əliyeva və Alena Əliyevanın bütün komandalara dəstək verməsi, uşaqlarla səmimi söhbət etməsi və onlarla şəkil çəkdirməsi oldu. Onlar iştirakçılara uğurlar arzulayaraq, bu cür tədbirlərin gələcəkdə daha geniş miqyasda və mütəmadi şəkildə keçirilməsinin vacibliyini vurğuladılar.

Yarış başa çatdıqdan sonra qalib komandalar hər iki yaş qrupu üzrə diplom, medal və kubokla təltif edildi. İkinci və üçüncü yerləri tutan komandalar da mükafatlandırıldı. Tədbirin təşkilatçıları, uşaqlar və tərbiyəçilər bu cür sosial layihələrin uşaqların həyatına çox müsbət təsir göstərdiyini bildirdilər. Onların sözlərinə görə, bu cür yarışlar uşaqlarda özünəinamın yaranmasına və sosial əlaqələrin yaxşılaşmasına kömək edir. Bu minifutbol turnirinin əsas hədəfi uşaqlar arasında sağlam həyat tərzini təşviq etmək, onların cəmiyyətə inteqrasiyasına dəstək olmaq və yeni dostluqlar yaratmaqdır. Qeyd edək ki, bu, may ayında təşkil edilən ilk "Dostluq Kuboku" ənənəsinin uğurlu davamı kimi reallaşdırılıb.