İlin ilk yarısında İTS hesabına koxlear implant əməliyyatı olunanların sayı açıqlanıb

İcbari Tibbi Sığorta (İTS) üzrə Dövlət Agentliyi 2025-ci ilin birinci yarısında icbari tibbi sığorta hesabına aparılan koxlear implantasiya əməliyyatları ilə bağlı məlumat yayıb. Bu müddətdə eşitmə qabiliyyətinin bərpası üçün 66 nəfərə cərrahi müdaxilə edilib. Koxlear implantasiya eşitmə itkisi olan şəxslərdə bu qabiliyyəti bərpa etmək üçün istifadə olunan ən müasir və effektiv tibbi üsullardan sayılır. Əməliyyatın icrası ciddi tibbi meyarlara uyğun aparılır. O, iki əsas qrupa tətbiq edilir: anadangəlmə ağır dərəcəli ikitərəfli eşitmə azlığı olan uşaqlar (nitq qabiliyyəti yoxdursa, 5 yaşa qədər) və eşitmə cihazlarından fayda görməyən, ikitərəfli ağır eşitmə itkisi olan böyüklər. Böyüklər üçün bu hədd 65 yaşa kimi müəyyən edilir. Diaqnozun təyini müraciətlə başlayır. Pasiyentlər ilk növbədə TƏBİB-in tabeliyindəki dövlət tibb müəssisələrinə və ya Səhiyyə Nazirliyinin müvafiq elmi-tədqiqat institutlarına yönlənməlidirlər.

Diaqnozun təyin edilməsi məqsədilə İTS hesabına bir sıra zəruri müayinələr aparılır. Bunlar Bera test, kompüter tomoqrafiyası (KT), maqnit rezonans tomoqrafiyası (MRT) və audiometriya müayinələridir. Diaqnoz təsdiqlənəndən sonra əməliyyatın icrası Agentliklə müqaviləsi olan tibb müəssisələrində, həm özəl, həm də dövlət qurumlarına aid olanlarda, göndəriş əsasında təmin edilir. Cərrahiyyə əməliyyatı tibbi göstərişlərə və təhlükəlilik dərəcəsinə görə növbəlilik prinsipi ilə həyata keçirilir. Sığorta əməliyyat zamanı istifadə olunan dərman və tibbi sərf materiallarını, daxili cihazı (implant sistemi) və cihazın yerləşdirilməsindən bir ay sonra verilən üst cihazı (nitq prosessoru) qarşılayır. Lakin nitq prosessoru yalnız implantasiya əməliyyatı zamanı quraşdırıldıqda sığortalanır. Əməliyyatdan sonrakı dövrlərdə prosessorun sıradan çıxması və ya yenisi ilə əvəz olunması halları İTS təminatına daxil deyil.

Əməliyyatdan sonra pasiyentlər icbari tibbi sığorta çərçivəsində 12 aylıq reabilitasiya dövrünə cəlb olunurlar. Bu uzunmüddətli reabilitasiya dövrü sığorta paketinə daxildir və pasiyentlərin normal həyata dönmələri üçün vacibdir. Bu müddət ərzində cihazda 3 dəfə səs tənzimlənməsi təmin edilir. Həmçinin 36 seans loqoped və 36 seans psixoloq xidməti həyata keçirilir. Loqoped və psixoloqlar əsasən nitq qabiliyyəti olmayan uşaqlar üzərində işləyirlər. Onlar uşaqların eşitmə qavrayışı və nitqini inkişaf etdirir, davranış, qavrama və ünsiyyət bacarıqlarının gücləndirilməsi üçün işlər aparırlar. Koxlear implantasiya əməliyyatı və ardınca gələn reabilitasiya sayəsində eşitmə və danışma məhdudiyyəti olan şəxslər sosial həyata aktiv şəkildə qoşularaq, şəxsi inkişaf imkanlarını genişləndirə bilirlər. Bu proqram insanlara həyat keyfiyyətlərini bərpa etməyə kömək edir.