"Il Meridiano Sport": "Qarabağ" hər kəsi sürprizlərə alışdıran bir komandadır

İtaliyanın idman nəşri "Il Meridiano Sport", UEFA Çempionlar Liqasının əsas mərhələsində "Qarabağ" ilə "Napoli" arasında keçirilən qarşılaşmaya həsr olunmuş məqaləsində Ağdam klubunu xüsusi qiymətləndirib. Nəşrin fikrincə, "Qarabağ" hər kəsi sürprizlərə alışdıran bir komandadır. Məhz buna görə "Napoli" bu qədər təşkilatlanmış rəqib qarşısında maksimum konsentrasiya göstərməlidir. Ağdam klubu artıq 2025/2026 mövsümünün Çempionlar Liqasının əvvəlki dörd matçında gücünü və xarakterini nümayiş etdirib. Bu baxımdan, İtaliya təmsilçisi olan "Napoli"yə diqqət, tarazlıq və qərar qəbulunda keyfiyyət tələb olunacaq.

"Qarabağ"ın cari turnirdə göstərdiyi nəticə onların 2017/2018 mövsümündəki UEFA Çempionlar Liqası debütündən (2 heç-heçə və 4 məğlubiyyət) tamamilə fərqlidir. Azərbaycan çempionu bu mövsüm ilk qələbəni "Benfika" ilə matçda 3:2 hesabı ilə qazandı. Daha sonra "Kopenhagen" komandasını məğlub etdi, "Çelsi" ilə hesab 2:2 oldu, "Atletik"lə matçda isə məğlubiyyət yaşadı. Nəşr bildirir ki, Azərbaycan klubu matç başına orta hesabla 2 qol göstəricisi ilə 7 xal toplayaraq "Stadio Diego Armando Maradona"ya çıxır. Bu yüksək xal və qol göstəricisi "Napoli" üçün çox vacib bir xəbərdarlıqdır.

"Il Meridiano Sport" vurğulayır ki, "Qarabağ" Azərbaycan futbolunun ən tanınmış komandasıdır. Klub son illərdə UEFA yarışlarında ardıcıl olaraq təcrübə yığıb və avrokuboklarda daimi iştirakçıya çevrilib. Məqalədə qeyd olunur ki, "Adzurri" ("Napoli") üçün bu, maksimum diqqət tələb edən bir matç olacaq, çünki qarşılarında təşkilatlanmış bir rəqib var. Hətta "Napoli"nin baş məşqçisi Antonio Konte də bu fikri təsdiqləyir. Konte daha əvvəl "Qarabağ"ı bu mövsüm Çempionlar Liqasının sürpriz komandası adlandırmışdı. O əlavə edib ki, onlar yeni çağırışa hazırlaşmalıdırlar.