Herontoloji Mərkəzin fəaliyyəti Qocalar evindən nə ilə fərqlənir? - Səhiyyə Nazirliyi açıqlayır

Ölkəmizdə aparılan davamlı sosial islahatlar nəticəsində həssas əhali qruplarından olan şəxslər, o cümlədən tənha ahıl şəxslər dövlət qayğısı və sosial müdafiə ilə əhatə olunur. Səhiyyə Nazirliyi Bakı Şəhər Herontoloji Mərkəzinin direktoru vəzifəsini icra edən Nailə Əhmədova bu barədə danışıb.

O qeyd edib ki, iki əsas qurum yaşlılara fərqli sahələrdə xidmət göstərir. Səhiyyə Nazirliyi Bakı Şəhər Herontoloji Mərkəzi məhz yaşlı insanlara daha ixtisaslaşmış və keyfiyyətli tibbi yardım göstərmək məqsədilə yaradılıb. Əmək və Əhalinin Sosial Müdafiəsi Nazirliyinin tabeliyində olan Sosial Xidmətlər Agentliyinin vəzifəsi isə fərqlidir. Bu agentlik ahıl şəxslərin yaşayışını təmin etməklə, onları keyfiyyətli sosial xidmətlərlə əhatə edir və onların asudə vaxtlarını mənalı keçirmələrinə şərait yaradır.

Mərkəzin həkimləri daima xarici və yerli konfranslarda, seminarlarda, həmçinin kurslarda iştirak edirlər. Onlar dünya praktikasını öyrənərək, onu Azərbaycanda tətbiq etməyi hədəfləyirlər. Mərkəz herontologiya elminin öyrəndiyi spesifik yaşa uyğun dəyişikliklərdən irəli gələn problemlərin həlli üçün də çalışır. Bu məqsədlə müxtəlif dövlət və qeyri-hökümət qurumları ilə birgə elmi araşdırmalar aparılır.

Herontoloji Mərkəz yaşlı insanların həyat keyfiyyətini yüksəltmək üçün müxtəlif yollardan istifadə edir. Onlar ahıl şəxslərin asudə vaxtlarını daha səmərəli keçirmələri üçün onları art terapiya ilə məşğul olan qurumlara yönləndirirlər. Mərkəz eyni zamanda ambulator xidmətlər göstərərək əhalinin sağlamlığının profilaktikasını və qorunmasını təşkil edir. Bu fəaliyyətlər yaşlı vətəndaşların sağlamlığının mühafizəsində mühüm rol oynayır.