Gələn ilin əsas trendlərindən biri "OpenBanking" modelinin tətbiqi olacaq - "PAŞA Bank"

“PAŞA Bank” ASC-nin idarə heyətinin üzvü Cəlal Orucov Bakıda keçirilən IX Beynəlxalq Bankçılıq Forumunda çıxış edərkən 2026-cı il üçün əsas maliyyə trendlərindən danışıb. Orucov qeyd edib ki, gələn ilin ən mühüm meyllərindən biri “OpenBanking” modelinin tətbiqi olacaq. Bu proses maliyyə sektorunda şəffaflığın artırılmasına gətirib çıxaracaq. Həmçinin, onun sözlərinə görə, bu model Mərkəzi Bankın tənzimləyici fəaliyyəti ilə sıx əlaqəli şəkildə həyata keçiriləcək. OpenBanking-in tətbiqi bank sektorunda yeni çağırışlar yaratmaqla yanaşı, inkişaf üçün yeni imkanlar açır.

Cəlal Orucov vurğulayıb ki, banklar üçün bu yeni modelin gündəlik əməliyyatlara daxil edilməsi əsas məsələlərdən biridir. Təşkilatlar bu sistemə uyğunlaşmalı və onun üzərindən öz gəlir mexanizmlərini formalaşdırmalıdırlar. Bu, sadəcə texniki yenilik deyil, eyni zamanda köklü iş modelinin dəyişməsi tələbidir. Banklar gələcək gəlir strategiyalarını bu yeni şərtlərə uyğun qurmalıdırlar.

Bank rəsmisi əlavə edib ki, “OpenBanking” uzun müddətdir gözlənilən yeni imkanları fintex şirkətləri üçün də yaradır. Bu, maliyyə texnologiyaları sahəsində fəaliyyət göstərən şirkətlərə bazara fərqli xidmətlərlə daxil olmasına kömək edəcək. Sektorun qarşısında duran əsas sual bu imkanlardan nə dərəcədə effektiv istifadə ediləcəyi və yeni xidmətlərin bazara hansı sürətlə təqdim ediləcəyi ilə bağlıdır. Bu sürət gələcək maliyyə mənzərəsini müəyyən edəcək.