Ermənistan vətəndaşlarının məhkəməsində təqsirləndirilən şəxslərin cəzalandırılmasına dair prokurorların təklifləri səsləndirilib

Noyabrın 13-də Bakı Hərbi Məhkəməsində Ermənistan vətəndaşlarının işi üzrə açıq məhkəmə iclası davam etdi. Bu şəxslər Azərbaycana qarşı hərbi təcavüz nəticəsində sülh və insanlıq əleyhinə cinayətlər, müharibə cinayətləri, terrorçuluq və hakimiyyəti zorla ələ keçirməkdə ittiham olunurlar. İttiham olunanlar arasında Arayik Harutyunyan, Arkadi Qukasyan, Bako Sahakyan, Davit İşxanyan, David Babayan və Levon Mnatsakanyan da var. Məhkəmə tərkibi hakimlər Zeynal Ağayev (sədrlik edən), Camal Ramazanov və Anar Rzayevdən ibarət idi. İclasda təqsirləndirilən şəxslər, onların vəkilləri, zərərçəkmiş şəxslərin bir qismi və dövlət ittihamını müdafiə edən prokurorlar iştirak etdilər. Proses dövlət ittihamını müdafiə edən prokurorların yekun çıxışı ilə davam etdi, onlar təqsirləndirilən şəxslərin cəzalandırılmasına dair konkret təkliflərini səsləndirdilər.

Baş prokurorun xüsusi tapşırıqlar üzrə köməkçisi Tuqay Rəhimli çıxış edərək irəli sürülmüş ittihamlar üzrə cinayət əməllərinin tövsifinə münasibət bildirdi. O qeyd etdi ki, BMT Təhlükəsizlik Şurasının 822, 853, 874 və 884 saylı qətnamələri Ermənistanın hərbi təcavüzü nəticəsində Azərbaycanın suveren ərazilərinin işğal edildiyini təsdiqləyir. İttiham tərəfi göstərdi ki, Ermənistan tərəfindən Azərbaycana qarşı aparılan təcavüzkar müharibə siyasəti aktiv hərbi əməliyyatların aparılmadığı dövrdə belə faktiki olaraq dayandırılmayıb. Ermənistan silahlı qüvvələri atəşkəsi dəfələrlə pozaraq Azərbaycan Silahlı Qüvvələrinin üzvlərini, mülki şəxsləri, mülki təyinatlı obyektləri, o cümlədən Gəncə, Bərdə və Bakı-Tbilisi-Ceyhan neft kəməri kimi mühüm strateji əhəmiyyətə malik obyektləri hədəfə çevirib. Məhkəmə istintaqı zamanı təqsirləndirilən şəxslər Arayik Harutyunyan, Arkadi Qukasyan və Bako Sahakyan Azərbaycanın işğal altında olan bölgələrinə, xüsusən Laçın rayonuna Ermənistandan əhalinin köçürüldüyünü ifadələrində təsdiqləyiblər. Bu hərəkət Cenevrə Konvensiyalarına Əlavə Protokolun tələblərinə zidd olaraq müharibə cinayəti sayılır.

Dövlət ittihamını müdafiə edən prokurorlar, Baş prokurorun böyük köməkçisi Vüsal Əliyev və Baş Prokurorluğun idarə şöbə rəisi Nəsir Bayramov çıxış edərək hər bir təqsirləndirilən şəxs üçün cəza təkliflərini səsləndirdilər. Onlar bəzi şəxslərin əməllərinin daha yüngül məsuliyyət nəzərdə tutan norma ilə tövsif edilməsini və bəzi ittiham bəndlərinin çıxarılmasını da məhkəməyə təklif etdilər. Prokurorlar Harutyunyan Arayik Vladimiri, Mnatsakanyan Levon Henrixi, Manukyan David Azati, İşxanyan Davit Rubeni və Babayan David Klimini törətdikləri çoxsaylı cinayət əməllərinə görə qəti olaraq ömürlük azadlıqdan məhrum etmə cəzasına məhkum edilməsini istədilər. Cəza müddətinin onların tutulduğu vaxtdan, 2023-cü ilin sentyabr və oktyabr aylarından hesablanması təklif edildi. Prokurorlar həmçinin Arkadi Qukasyan, Bako Sahakyan və Madat Babayanın ömürlük cəza nəzərdə tutan cinayətlərlə ittiham olunmalarına baxmayaraq, hökm çıxarılanadək 65 yaşına çatdıqları üçün Azərbaycan Respublikası Cinayət Məcəlləsinin tələblərinə uyğun olaraq ömürlük cəza ala bilməyəcəklərini vurğuladılar.

Yaş məhdudiyyətinə görə ömürlük cəza təyin edilməsi mümkün olmayan şəxslərə, eləcə də digər təqsirləndirilən şəxslərə müəyyən müddətə azadlıqdan məhrumetmə cəzası tətbiq edilməsi təklif olundu. Məsələn, Qukasyan Arkadi Arşavir və Sahakyan Bako Sahaki üçün qəti olaraq 20 il müddətinə azadlıqdan məhrum etmə cəzası təklif edildi. Madat Babayan, Melikset Paşayan, Vasili Beqlaryan, Qurgen Stepanyan və Erik Qazaryan üçün 20 ildən 16 ilədək, Davit Allahverdiyan üçün 18 il, Levon Balayan üçün isə 17 il cəza təklif edildi. Bu cəzaların ilk 10 ilinin həbsxanada, qalan hissəsinin isə ciddi rejimli cəzaçəkmə müəssisəsində çəkilməsi istənildi. Zərərçəkmişlərin nümayəndələri prokurorların cəzaya dair təklifləri ilə razılaşdıqlarını və buna uyğun hökm çıxarılmasını məhkəmə kollegiyasından xahiş etdilər. Məhkəmə prosesi noyabrın 27-də davam edəcək.