"EndeavorXR": Daha yüngül süni intellekt modellərinin yaradılmasına böyük investisiyalar qoyulmalıdır

Hesablama resurslarından daha az istifadə edən, daha yüngül süni intellekt (Sİ) modellərinin yaradılmasına böyük sərmayələr qoyulmalıdır. "EndeavorXR"in təsisçisi və CEO-su Ami Pek Bakıda keçirilən "StrategEast: Dövlət və İT üzrə Avrasiya Forumu 2025" tədbirinin ikinci günündə bu təklifi səsləndirdi. Pekin fikrincə, texnoloji tərəqqinin davamlı olması üçün Sİ-nin idarəetmə prinsiplərinə ciddi diqqət yetirmək lazımdır. O, dataların etibarlılığı və idarəolunması məsələsinin Sİ-nin effektivliyi üçün əsas şərt olduğunu vurğuladı. Siz dünyada ən yaxşı alətə sahib ola bilərsiniz, lakin əgər ondan heç kim istifadə etmirsə, bu alət heç bir nəticə verməyəcək.

Ami Pek Sİ agentləri ilə əməkdaşlıq mövzusunda bəzi narahatlıqlarını dilə gətirdi. Xüsusilə təşkilatdan kənarda işləyə bilən agentlərdən istifadə etməyə başladığımızda, agentlərin mənşəyini və idarəetmə standartlarını tam başa düşməliyik. Əgər biz bu siyasətləri həm təşkilat daxilində, həm də hökumət səviyyəsində müəyyən etməsək, problemlər dənizi ilə üzləşəcəyik. Pek rəhbərlərə səslənərək qeyd etdi ki, onlar daim öz siyasətlərini yenidən nəzərdən keçirmək və təzələmək imkanına malik olmaq üçün çevik davranmalıdırlar. Texnologiya sürətlə inkişaf edir, buna görə də idarəetmə mexanizmləri bu tempə uyğunlaşmalıdır.

Qonaq hazırda həm insan, həm də maşın dövrünün içində olduğumuzu qeyd etdi. Bu iki dövr arasındakı yeganə əsas fərq avtomatlaşdırma səviyyəsidir. Yüksək avtomatlaşdırılmış strukturlarda, xüsusilə də agent optimallaşdırma sistemlərində, insanı prosesə hansı məqamda daxil edəcəyimizi dəqiq müəyyənləşdirməliyik. Eyni zamanda, süni intellektdən hansı rolda istifadə edəcəyimiz də böyük əhəmiyyət daşıyır. Sİ-nin yalnız "ikinci pilot" kimi çıxış edib-etməməsi yox, onun hansı funksiyaları yerinə yetirməsi kritikdir. Bu ayırıcı xətlərin çəkilməsi gələcək Sİ tətbiqlərinin uğuru üçün vacibdir.