Dəmiryol Muzeyində “Qara qızılın saldığı dəmir yollar” sərgisi açılıb (FOTO)

Dəmiryol Muzeyində “Qara qızılın saldığı dəmir yollar” adlı fotosərgi açılıb. Bu tədbir “Azərbaycan Dəmir Yolları” QSC və “Balakhani Operating Company” LTD-nin birgə təşkilatçılığı ilə baş tutub.

Sərgi XIX əsrin sonu - XX əsrin əvvəllərində Azərbaycanda neft sənayesi ilə dəmir yolları arasında formalaşan qarşılıqlı əlaqəni əks etdirən nadir arxiv fotolarını təqdim edir. Bu şəkillərin əksəriyyəti ilk dəfədir ki, ictimaiyyətə nümayiş olunur. “Qara qızılın saldığı dəmir yollar” sərgisi Azərbaycanın sənaye və nəqliyyat tarixində vacib yer tutan iki sahənin - neft və dəmir yollarının bir-birini tamamlayan inkişaf yolunu göstərir.

Bu iki sahənin inkişafı ölkə üçün dönüş nöqtəsi oldu. Azərbaycanın ilk dəmir yolu - Bakı-Sabunçu-Suraxanı xətti 1880-ci ildə istifadəyə verildi. Bu qatarlar dünya miqyasında ilk dəfə nefti vaqon-sisternlərlə daşıyaraq tarixi hadisəyə imza atdı. Qısa müddət sonra, bu dəmir yolları yalnız neft daşımadı. Onlar həm də minlərlə sərnişini, neftçini və onların ailələrini Abşeronun mədənlərindən şəhərə və ya əksinə daşımağa başladı. Bu inkişaf regionda yaşayışı kökündən dəyişdi.

Nəqliyyat sahəsində irəliləyişlər bununla bitmədi. 1926-cı ildə Bakıda keçmiş SSRİ məkanında ilk elektrikləşdirilmiş dəmir yolu istifadəyə verildi. Həmin xəttin qatarları Dəmiryol Muzeyinin yerləşdiyi binadan Sabunçuya yola düşürdü. Sərgi neft və dəmir yollarının necə birgə formalaşdığını göstərərək, bu sənaye irsinə diqqəti yönəldir.