Böyük Britaniya "Lukoil International"a ümumi lisenziya verib

Böyük Britaniya hökuməti "Lukoil"in xaricdəki aktivlərinin sahibi olan "Lukoil International GmbH" şirkətinə ümumi lisenziya verib. Bu qərar Rusiyanın enerji nəhəngi ilə əlaqəli fəaliyyətlərə müəyyən dərəcədə icazə verilməsi anlamına gəlir.

Bu barədə Xəzinədarlıq Departamenti nəzdində fəaliyyət göstərən Böyük Britaniyanın Maliyyə Sanksiyalarına Nəzarət Ofisinin (FSI) yaydığı bəyanatda bildirilir. Şirkətlə aparılan əməliyyatlara icazə verən bu sənədin etibarlılıq müddəti dəqiq müəyyənləşdirilib. Lisenziya 26 fevral 2026-cı il tarixinədək qüvvədə qalacaq. "Lukoil"in beynəlxalq fəaliyyətini tənzimləyən bu sənəd sanksiya rejimində verilən vacib bir güzəştdir.

Britaniya hakimiyyəti bu qərarla yanaşı, "Lukoil"in Bolqarıstandakı törəmə şirkətləri üçün də lisenziyaları uzadıb. Ümumilikdə dörd müxtəlif qurum üçün verilən lisenziyaların müddəti 2026-cı il fevralın 14-dək qüvvədədir. Bu qurumlara "Lukoil Bulgaria", "Lukoil Neftochim Burgas", "Lukoil Aviation Bulgaria" və "Lukoil Bunker Bulgaria" daxildir. Hökumət bu addımı ilə Rusiya şirkətinin müxtəlif ölkələrdəki əməliyyatlarına müəyyən sabitlik gətirir.