Azərbaycanla ABŞ arasında hərbi əməkdaşlığın yeni perspektivləri müzakirə olunub (FOTO)

Oktyabrın 18-də Bakıda Azərbaycanın müdafiə naziri general-polkovnik Zakir Həsənov ABŞ Mərkəzi Komandanlığının komandanı, Hərbi Dəniz Qüvvələrinin admiralı Bred Kuperin rəhbərlik etdiyi nümayəndə heyəti ilə görüşüb. Bu görüşdə Azərbaycanla ABŞ arasında hərbi əməkdaşlığın yeni perspektivləri müzakirə mövzusu olub. Qonaqlar görüşdən əvvəl Şəhidlər xiyabanını ziyarət edərək, Vətən uğrunda canından keçən şəhidlərimizin xatirəsini ehtiramla yad ediblər.

Müdafiə naziri general-polkovnik Z.Həsənov qonaqları salamladı. O, onlara Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusunda aparılan uğurlu islahatlar barədə məlumat verdi. Nazir ikitərəfli əməkdaşlığın fərqli istiqamətləri üzrə həyata keçirilən tədbirlərdən və mövcud əlaqələrdən məmnunluğunu dilə gətirdi. Bu cür əlaqələr hər iki tərəf üçün əhəmiyyətlidir.

Admiral B.Kuper səmimi qəbula və göstərilən qonaqpərvərliyə görə təşəkkür etdi. O, qarşılıqlı səfərlərin mövcud əlaqələrimizin daha da güclənməsinə olan faydalarını xüsusi vurğuladı. Admiral Kuper, həmçinin Azərbaycan Ordusunun hərbi qulluqçularının Əfqanıstandakı “Qətiyyətli dəstək” qeyri-döyüş missiyasına verdiyi töhfəyə görə minnətdarlığını ifadə etdi. Qonaq iki ölkə arasındakı əməkdaşlığın inkişaf etdirilməsinin zəruriliyini diqqətə çatdırdı.

Sonda tərəflər Azərbaycan ilə ABŞ arasında mövcud hərbi əməkdaşlığın gələcək inkişafına aid olan yeni məsələləri ətraflı şəkildə müzakirə etdilər.