Azərbaycanda gələn il əsas kapitala 24,6 milyard manat investisiya qoyulacağı proqnozlaşdırılır

Azərbaycanda gələn il əsas kapitala qoyulan investisiyaların həcmi 24,6 milyard manat təşkil edəcək. Bu il üçün ümumi investisiya qoyuluşunun 22,6 milyard manat olacağı gözlənilir. Bu rəqəmlər Milli Məclisin İqtisadi siyasət komitəsinin bugünkü iclasında müzakirə edilən 2026-cı il dövlət büdcəsinin layihəsinə dair Azərbaycan Respublikası Hesablama Palatasının rəyində yer alıb.

Sənədə görə, bu göstəricilər üzrə real artım tempi müvafiq olaraq bu il 0,5%, 2026-cı il üzrə isə 6,9% gözlənilir. Orta müddətli dövr üçün əsas fiskal parametrlər "Büdcə zərfi"nə əsasən, xam neftin fərqli qiymət ssenariləri əsasında hazırlanıb. Proqnozların hazırlanması zamanı baza ssenarisində əsas xarici parametr olan neftin qiyməti 65,0 ABŞ dolları səviyyəsində müəyyən edilib.

Bu ssenari əsasında, növbəti ildə ölkə iqtisadiyyatının real ifadədə 2,9% artacağı proqnozlaşdırılır. Həmçinin, istehsal edilən Ümumi Daxili Məhsulun (ÜDM) 134,1 milyard manat olacağı gözlənilir. Növbəti ildə iqtisadi artıma töhfə verən yeganə sahənin qeyri-neft qaz sektoru olacağı nəzərdə tutulur. Bu proqnozlar iqtisadiyyatın şaxələndirilməsinə verilən diqqəti göstərir.