Azərbaycan şahmatçıları dünya çempionatında ikinci olub

Azərbaycanın qadınlardan ibarət şahmat üzrə milli komandası İspaniyanın Linares şəhərində keçirilən dünya çempionatında böyük uğura imza atıb. Komanda bu mötəbər yarışda ikinci yerin sahibi oldu. Bu turnir Beynəlxalq Şahmat Federasiyasının (FIDE) təşkilatçılığı ilə baş tuturdu.

Turnirin həlledici mərhələsində millimiz FIDE komandası ilə üz-üzə gəldi. Azərbaycanı bu yarışda Ülviyyə Fətəliyeva, Gövhər Beydullayeva, Xanım Balacayeva, Gülnar Məmmədova və Ayan Allahverdiyeva təmsil edirdi. Onların mübarizəsi böyük maraqla qarşılandı.

Təəssüf ki, həlledici görüşlərdə Azərbaycan şahmatçıları FIDE komandasına məğlub oldu. Komanda ilk qarşılaşmada 1:3, ikinci oyunda isə 1,5:2,5 hesabı ilə uduzdu. Buna baxmayaraq, dünya çempionatında gümüş medal qazanmaq Azərbaycan şahmatı üçün yüksək nəticədir. Qeyd etmək lazımdır ki, komandanın kapitanı İlahə Qədimova olub.