Azərbaycan Pakistanda keçirilən Regional Nəqliyyat Nazirləri Konfransında təmsil olunur

Pakistanın paytaxtı İslamabadda Regional Nəqliyyat Nazirləri Konfransı keçirilir. 27 ölkənin qatıldığı bu tədbirdə Azərbaycanı rəqəmsal inkişaf və nəqliyyat nazirinin müavini Rəhman Hümmətov təmsil edir.

Cənab Hümmətov toplantıda çıxış edərək Azərbaycanda və regionda nəqliyyat dəhlizlərinin inkişafı barədə məlumat verib. O bildirdi ki, ölkəmiz uzun illərdir Avropa ilə Mərkəzi və Cənubi Asiyanı birləşdirən mühüm tranzit mərkəzi kimi çıxış edir. Azərbaycan Şərq və Qərb, eləcə də Şimal və Cənub arasındakı kəsişmə nöqtəsində yerləşir. Ölkə rəhbərliyi böyük infrastruktur layihələrinə sərmayə qoyub və güclü multimodal nəqliyyat şəbəkəsi yaradıb.

Bu səylərin nəticəsi olaraq tranzit həcmləri əhəmiyyətli dərəcədə artıb. 2024-cü ildə ümumi tranzit həcmi 2019-cu illə müqayisədə 2.5 dəfə böyüyərək 14.5 milyon tona çatıb. Bu yükün təxminən 30 faizi Orta Dəhliz vasitəsilə daşınıb. Bu rəqəmlər Azərbaycanın beynəlxalq tranzit sistemində möhkəmlənən mövqeyini göstərir.

Rəhman Hümmətov çıxışında Zəngəzur dəhlizinin regional ticarət üçün böyük əhəmiyyət daşıdığını vurğulayıb. Bu marşrut təkcə Şərq – Qərb istiqamətində deyil, həmçinin Şimal – Cənub və Cənub – Qərb əlaqələrini də gücləndirəcək. Dəhliz üzrə ildə 15 milyon ton yükün daşınması gözlənilir. Bu potensial regional ticarətin həcmini xeyli artıracaq.

Regional Konfrensiya çərçivəsində nazir müavini bir sıra ikitərəfli görüşlər keçirdi. Bu görüşlərdə əməkdaşlıq perspektivləri müzakirə olundu. Eyni zamanda, ölkəmizdə və regionda nəqliyyat sahəsində həyata keçirilən layihələr barədə də danışıldı.