İSB beynəlxalq komitədə təmsil olunacaq

"İcbari Sığorta Bürosu" (İSB) Belçikanın Brüssel şəhərində yerləşən Bürolar Şurasının Daxili Reqlamentlər Komitəsinin (IRC) Cənub-Şərq Regional Qrupu üzrə komitədə təmsil olunmaq haqqı qazandı. Bu, Azərbaycanın beynəlxalq sığorta qurumlarındakı mövqeyini gücləndirən mühüm hadisədir.

IRC-nin növbəti dövr üçün keçirilən seçkilərində İcbari Sığorta Bürosu 11 səsdən 8-ni qazanaraq komitədə yer alma hüququnu əldə etdi. Bu təmsilçilik İSB-nin beynəlxalq əməkdaşlığının genişlənməsinə və "Yaşıl Kart" sistemi üzrə proseslərin daha səmərəli koordinasiyasına böyük fayda verəcək.

Daxili Reqlamentlər Komitəsi (IRC) "Yaşıl Kart" sistemindəki bütün büroların qarşılıqlı işini, prosedurlarını və iş prinsiplərini tənzimləyən strateji komitələrdən biridir. O, həmçinin sistem üzrə qaydaların təkmilləşdirilməsi işini həyata keçirir. Bürolar Şurası avtonəqliyyat vasitələri sığortaçılarının milli bürolarının beynəlxalq assosiasiyasıdır və eyni zamanda "Yaşıl Kart" Sisteminin inzibatçılığına cavabdeh idarəedici təşkilatdır. Şuranın əsas məqsədi bu sistemə daxil olan üzv ölkələrdə yol-nəqliyyat hadisəsi nəticəsində zərər çəkmiş şəxslərin müdafiəsinə nail olmaqdır.

İSB 2016-cı ildə Beynəlxalq Bürolar Şurasına üzv seçilib və Beynəlxalq Yaşıl Kart Sistemində Azərbaycanı təmsil edir. Azərbaycanın bu sistemdəki rolu zamanla genişlənməkdədir. 2023-cü ilin yanvarın 1-dən etibarən Gürcüstan və Qazaxıstanda qeydiyyatdan keçmiş nəqliyyat vasitələrinə də Azərbaycan Green Kartlarının satışı həyata keçirilir.