AZAL uçuş cədvəlindəki mümkün dəyişikliklərə qarşı sığorta xidmətini istifadəyə verib

“Azərbaycan Hava Yolları” (AZAL), AZCON Holding şirkətlərindən biri olaraq, sərnişinlərini uçuş cədvəlində yarana biləcək gözlənilməz dəyişikliklərdən qabaqcadan qorumaq üçün nəzərdə tutulan DAFAR adlı yeni rəqəmsal xidməti istifadəyə verdi. DAFAR (“Disruption Assistance For Any Reason”) xidməti, reysin ləğvi və ya gecikməsi kimi hallarda sərnişinlərə operativ dəstək verilməsini təmin edir.

Bu xidmət səyahət texnologiyaları üzrə fəaliyyət göstərən qlobal platforma olan HTS (“Hopper Technology Solutions”) ilə əməkdaşlıq sayəsində tətbiq edilib. Sərnişinlər DAFAR xidmətini AZAL-ın rəsmi veb-saytı və mobil tətbiqində bilet bron edilməsi mərhələsində əlavə seçim kimi əldə edə bilərlər. Bu yeni təklif AZAL sərnişinlərinə səyahət risklərini idarə etməyə yardım edir. HTS məlumat təhlili və süni intellektə əsaslanan texnologiyalarla müasir səyahət edənlərə dəstək məqsədilə fintex həllər hazırlayan aparıcı qlobal platformadır. Şirkət dünya üzrə böyük banklar, aviaşirkətlər və turizm xidmətləri təminatçıları ilə işləyir.

DAFAR ödənişli əsasda təqdim edilir və xidmətin dəyəri istiqamətdən asılı olaraq dəyişir. Xidmət aktivləşdirildikdə, sistem avtomatik olaraq reysin statusunu izləyir. Əgər uçuş iki saat və ya daha çox gecikərsə, yaxud həmin gün ləğv olunarsa, sərnişinə xüsusi bildiriş göndərilir və ona iki əsas seçim verilir. Sərnişin ya müəyyən edilmiş limit çərçivəsində əlavə ödəniş etmədən eyni marşrut üzrə uçuş həyata keçirən istənilən aviaşirkətə biletini yenidən bron edə bilər. Yaxud, biletin dəyərinin 100% geri qaytarılması imkanı var; sərnişin istəyi ilə səyahətini ilkin biletlə davam etdirmək seçimi də saxlanılır.

“Azərbaycan Hava Yolları”nın baş kommersiya inzibatçısı Cəmil Manizadə yeni xidmətin tətbiqini yüksək qiymətləndirib. O bildirdi ki, AZAL səyahətçilərin dəyişən ehtiyaclarına uyğun gələn müasir həllərin tətbiqinə önəm verir. Manizadə əlavə etdi ki, bu tərəfdaşlıq müştəri loyallığını gücləndirməyə və sərnişinlər üçün daha çevik xidmətin təmin edilməsinə kömək edəcək. Hopper və HTS-in prezidenti və həmtəsisçisi Dakota Smit də Azərbaycan Hava Yolları ilə əməkdaşlıqdan qürur duyduğunu dedi. Smit, fintex həllərinin Avrasiya regionunda sərnişinlər üçün yeni imkanlar açdığını və əlavə dəyər yaratdığını vurğuladı.