ASCO gəmilərinin iştirakı ilə “Neptun” qurğusunun yedəklənməsi əməliyyatı başlayıb

AZCON Holding şirkətlərinə daxil olan ASCO gəmilərinin iştirakı ilə 18 oktyabr tarixində mühüm dəniz əməliyyatına start verilib. Bu iş çərçivəsində “Neptun” özüqalxan qazma qurğusu dənizdəki fəaliyyət göstərəcəyi sahəyə – "Ümid" platforması ərazisinə yedəklənir. Bu əməliyyat qurğunun istismar yerinə təhlükəsiz çatdırılmasında vacib bir mərhələdir.

Yedəkləmə əməliyyatında ASCO-nun təchizat-yedək gəmiləri iştirak edir. Şirkətin “Mərdəkan”, “Zirə” və “Andoqa” adlı gəmiləri qurğunun nəqlini həyata keçirir. Bu xüsusi təyinatlı gəmilər “Neptun” qurğusunun “Ümid” platforması ərazisinə qısa zamanda və təhlükəsiz şəkildə çatdırılması üçün fəaliyyət göstərir.

Xatırladaq ki, “Neptun” özüqalxan qazma qurğusu bu ilin iyun ayında ölkəmizə gətirilmişdi. O, modifikasiya işlərinin aparılması üçün ASCO-nun gəmilərinin dəstəyi ilə Xəzərin Türkmənistan sektorundan Azərbaycana gətirilmişdi. Həmin nəqliyyat əməliyyatında daha çox gəmi iştirak etmişdi. “Hövsan”, “Hövsan-2”, “SOCAR-1”, “Andoqa”, “Şüvəlan” və “Mərdəkan” gəmiləri iyun ayında qurğunun gətirilməsinə kömək etmişdi.