"Araz-Naxçıvan"ın vitse-prezidenti: "Benfika"ya böyükhesablı məğlubiyyət bir dərsdir"

Futzal üzrə UEFA Çempionlar Liqasının 1/8 final mərhələsinin ilk matçı "Araz-Naxçıvan" üçün ağır nəticələndi. Azərbaycan təmsilçisi Portuqaliyanın güclü "Benfika" klubuna 0:9 hesabı ilə məğlub oldu. Naxçıvan klubunun vitse-prezidenti Mahmud Sadıqov bu böyükhesablı məğlubiyyəti bir dərs kimi qiymətləndirib.

O, rəqibin gücünü etiraf edərək, Portuqaliya təmsilçisinin bütün komponentlərdə üstün olduğunu söylədi. Sadıqov "Benfika"nın Avropanın sayılıb-seçilən, UEFA Çempionlar Liqasında birincilik uğrunda mübarizə aparan komandalardan biri olduğunu qeyd etdi. O, rəqibin layiqli qələbə qazandığını bildirdi. Vitse-prezident komandada yaşanan heyət problemlərinə də toxundu. Bildiyimiz kimi, komandanın 3 futzalçısı bu görüşdə oynamadı. Onların əvəzinə heyətə dəvət edilən gənc oyunçuların beynəlxalq təcrübələri olmadığına görə müəyyən çaşqınlıqlar yaranırdı.

Buna baxmayaraq, Mahmud Sadıqov hesabın bu cür olacağını heç kimin gözləmədiyini vurğuladı. Klub rəsmisi komandanın bütün səhvlərini müzakirə edib, lazımi nəticəni çıxaracağına inandığını söylədi. O, cavab matçında komandanın daha yaxşı oyun göstərəcəyinə ümid edir. Sadıqov deyir ki, mümkünsüz heç nə yoxdur, çünki top yumru, meydança da düzdür və "Araz-Naxçıvan" mobil komandadır, oynamağı bacarır. O, Azərbaycan futzalını təmsil etdiklərini xatırlatdı və rəqibə layiqli cavab vermək üçün var gücləri ilə çalışacaqlarına söz verdi. O, 9 qol vurmağa söz verməsə də, rəqibin meydanında yaxşı oyun göstərəcəklərinə inandığını əlavə etdi. Tərəflər arasında cavab matçı dekabrın 5-də Portuqaliyada keçiriləcək.