Aİ Şengen vizalarının verilməsi qaydalarında dəyişiklikləri elan edib

Avropa İttifaqı (Aİ) Şengen vizalarının verilməsi qaydalarında dəyişikliklər olacağını elan edib. Brüssel viza siyasəti Aİ ölkələrinin səlahiyyətində olsa da, zəruri hallarda ümumAvropa qaydaları tətbiq edə bilir. Təhlükəsizlik və miqrasiya riskləri nəzərə alınaraq, çoxtərəfli vizaların verilməsi şərtləri sərtləşdirilə bilər. Aİ-nin rəsmi nümayəndəsi Markus Lammert rusiyalılara Şengen vizalarının verilməsinin sərtləşdirilməsi ilə bağlı yayılan məlumatları şərh edərkən bu barədə danışıb.

O, 2022-ci ildə Rusiya vətəndaşlarına qarşı müəyyən məhdudiyyətlər tətbiq edildiyini təsdiqləyib, lakin çoxtərəfli vizaların verilməsinə qadağa qoyulmadığını bildirib. M. Lammert jurnalistlərə vəziyyətin yaxın zamanda dəyişə biləcəyini və bununla bağlı yeni xəbərlərin olacağını çatdırıb. Ukraynada müharibənin başlamasından sonra Aİ Rusiya ilə olan sadələşdirilmiş viza rejimi haqqında sazişi dərhal dayandırmışdı. Bundan əlavə, Aİ üzv ölkələrə Rusiya vətəndaşlarına "Şengen" verilməsini məhdudlaşdırmağı, həmçinin sərhəd nəzarətini və təhlükəsizlik tədbirlərini gücləndirməyi tövsiyə etdi. Bu addımlar təhlükəsizlik narahatlıqları fonunda atılıb və vizaların verilməsi prosesini daha nəzarətli edir.

Aİ vizaların verilməsinin statistik göstəricilərini də diqqət mərkəzində saxlayır. 2019-cu ildə Rusiya vətəndaşlarına 4 milyondan çox Şengen vizası verilmişdi. Müqayisə üçün, 2023-cü ildə bu rəqəm kəskin şəkildə azalaraq 500 minə enib. Lakin 2024-cü ildə verilən vizaların sayında yenidən artım müşahidə edilir. Rəsmi şəxslər bu artımı qeyd edirlər, çünki bu, əlavə məhdudiyyətlərin nəzərdən keçirilməsi üçün səbəblərdən biri ola bilər. Beləliklə, Aİ bu məsələdə mövqeyini yenidən qiymətləndirir və yaxın gələcəkdə yeni rəsmi qərarların gözlənildiyi bildirilir.