Agentlik məktəblərdə müəllim vakansiyasının gizlədilməsi iddialarına münasibət bildirib

Məktəbəqədər və Ümumi Təhsil üzrə Dövlət Agentliyi (MÜTDA) məktəblərdə müəllim vakansiyalarının gizlədilməsi haqqında iddialara cavab verib. Agentliyin şöbə müdiri Nurlan İsmayılbəyli bildirib ki, vakant yerlərin müəyyənləşdirilməsi ilə bağlı vahid və sistemli yanaşma mövcuddur. O, vakansiyaların müsabiqəyə çıxarılmasının şəxsi qərarlardan asılı olmadığını, yalnız mövcud qaydalara uyğun həyata keçirildiyini qeyd edib.

Son illər ərzində əməkhaqqı sistemi və ümumi təhsil müəssisələrinin idarəetməsinin elektron sistemə keçməsi bu prosesi xeyli asanlaşdırıb. Hazırda ölkə üzrə müəllimlərin hansı istiqamətlərdə işlədiyi və hansı ərazilərdə müəllim çatışmazlığının olduğu dəqiq şəkildə izlənilir. İsmayılbəyli qeyd edir ki, formalaşan yanlış təsəvvürlərdən biri müəllim işdən ayrılan kimi (yaş həddi, sertifikatlaşdırma və ya digər səbəblərdən) onun dərs saatlarının dərhal müsabiqəyə təqdim edilməli olmasıdır. Lakin bu, hər zaman tətbiq edilən bir mexanizm deyil.

Bəzi məktəblərdə ehtiyac duyulandan artıq ibtidai sinif müəllimləri mövcud ola bilir. İbtidai siniflərdə ehtiyacın hesablanması nisbətən asan sayılır, çünki mövcud siniflərin sayı birbaşa müəllim ehtiyacını müəyyən edir. Digər fənlər üzrə, xüsusilə yuxarı siniflərdə dərs yükünün formalaşma prinsipləri fərqlənir. Buna görə də ehtiyacın müəyyənləşdirilməsi daha fərqli meyarlar üzrə həyata keçirilir. Yuxarı siniflərdə "bir sinif – bir müəllim" prinsipi tətbiq edilmir, nəticədə dərs saatları üzrə bölgü aparılır və bəzən az saatlı dərs yükü ilə təminat halları yaranır.

Agentliyin apardığı təhlillər göstərir ki, hər bir müəllimin işdən ayrılması mütləq şəkildə müəssisədə vakant yer formalaşdırmır. Bəzi hallarda müəllimlərin çıxması həmin məktəbdə yüksək qiymətləndirmə nəticəsi olan mövcud müəllimlərin dərs yükünün artırılmasına gətirib çıxarır. Bu yanaşma ilə vakant yerlərin sistemli idarə edilməsi təmin olunur.