Lökbatanda böyük anbar yanğını - Fövqəladə hallar naziri hadisə yerindədir
Bakı şəhərinin Qaradağ rayonunun Lökbatan qəsəbəsində yerləşən "Bakı Logistika"ya məxsus anbarda güclü yanğın baş verib. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin əməkdaşları, yanğınsöndürən texnikalar və canlı qüvvə cəlb olunub. Yanğının miqyasını nəzərə alaraq, FHN-in helikopteri də söndürmə əməliyyatına qoşulub. Fövqəladə hallar naziri general-polkovnik Kəmaləddin Heydərov şəxsən hadisə yerinə gələrək yanğınla mübarizə tədbirlərinin gedişatını yerində izləyir. Yanğınsöndürmə işləri intensiv şəkildə davam etdirilir.
Şəkidə dağlıq ərazidə köməksiz qalan şəxslər xilas edilib
Ötən gecə Şəki rayonunun dağlıq ərazisində iki nəfər yolunu azaraq köməksiz vəziyyətdə qalıb. Hadisə barədə Fövqəladə Hallar Nazirliyinin "112" qaynar telefon xəttinə məlumat daxil olub. Məlumatla əlaqədar FHN-in Dövlət Yanğından Mühafizə Xidmətinin Şəki bölməsinin əməkdaşları dərhal əraziyə yollanıb. Xilasetmə əməliyyatı uğurla başa çatıb və hər iki şəxs təhlükəsiz şəkildə xilas edilib.