YouTube 10 ildən sonra video pleyerini yeniləyir!

Dünyanın ən böyük video paylaşım platforması YouTube, 10 ildən sonra video pleyerinin dizaynında əsaslı dəyişikliklər edir. Yeni video pleyer, əvvəlcə veb versiyası üçün məhdud sayda istifadəçi ilə sınaqdan keçirilir. Dizayn, Google-un son illərdə digər xidmətlərində istifadə etdiyi "Material Design 3" dizayn dilinə əsaslanır.

Yenilənmiş interfeysdə idarəetmə düymələri yarı şəffaf görünüşə malikdir və hər bir düymə kapsul formasında ayrıca bölmədə yerləşdirilib. Bu, ümumi görünüşü daha müasir, səliqəli və sadə etməyi hədəfləyir. Ən diqqət çəkən dəyişiklik isə səs səviyyəsinin tənzimlənmə mexanizmindədir. Əvvəllər video pleyerin sol alt küncündə yerləşən səs səviyyəsi tənzimləyicisi indi sağ alt küncə köçürülüb. İstifadəçi səs simvoluna kliklədikdə, üfüqi səs zolağı əvəzinə şaquli sürgü ilə qarşılaşır.

Bundan əlavə, əvvəlki dizaynda klaviaturadakı yuxarı və aşağı ox düymələri ilə səs səviyyəsini tənzimləmə imkanı da yeni dizaynda aradan qaldırılıb. Bu dəyişiklik, xüsusilə klaviatura qısayollarına alışmış istifadəçilər arasında narazılığa səbəb olub. YouTube, A/B testləri vasitəsilə yeni video pleyer interfeysini məhdud sayda istifadəçi qrupuna təqdim edir. Bu proses zamanı toplanan rəylər yeni dizaynın daimi olub-olmayacağını müəyyənləşdirəcək.