Xpeng-in 2025-ci il üçün planları açıqlandı

Çinli elektrikli avtomobil istehsalçısı Xpeng şirkəti 2025-ci il üçün məhsul planlarını açıqlayıb. Şirkətin prezidenti He Xiaopeng bu il üç yeni modelin təqdim olunacağını bildirib. Bu modellərə tam elektrikli krossover, yeni nəsil elektrikli sedan və Xpeng-in ilk genişləndirilmiş diapazonlu SUV daxildir. Xpeng, 2025-ci ilə böyük ambisiyalarla qədəm qoyub. He Xiaopeng bu avtomobillərin hansı bazarlarda satışa çıxarılacağı barədə dəqiq məlumat verməyib.

İyun ayında təqdim olunacaq ilk model Xpeng G7 krossoveri olacaq. Çində satış lisenziyası üçün müraciət edilmiş bu modelin texniki xüsusiyyətləri əvvəllər ictimaiyyətə təqdim olunmuşdu. G7-nin uzunluğu 4892 mm, eni 1925 mm, hündürlüyü isə 1655 mm-dir. Təkər bazası 2890 mm-dir. Avtomobil 218 kVt (292 at gücü) elektrik mühərriki ilə təchiz olunub və iki fərqli batareya seçimi (68.5 kVt/saat və 80.9 kVt/saat) təklif olunur. Çinin CLTC standartlarına görə, 577-702 kilometr məsafə qət edə bilir. Avtomobilin başlanğıc qiymətinin təxminən 27300 dollar olacağı gözlənilir.

Şirkətin məşhur sedan modeli Xpeng P7-nin yeni nəsli ilin üçüncü rübündə təqdim olunacaq. Yeni P7-nin qiymətinin təxminən 41650 dollar olacağı gözlənilir. Dizaynı yenilənmiş model Xpeng-in yeni nəsil Turing AI çipindən istifadə edəcək. Şirkət avtomobilin xüsusilə dizayn dili və texnoloji infrastrukturu ilə seçiləcəyini vurğulayır.

İlin sonuncu rübündə təqdim olunacaq üçüncü model isə Xpeng-in ilk EREV (genişləndirilmiş diapazonlu elektrikli avtomobil) avtomobili olacaq. G01 kod adı ilə tanınan bu SUV modeli əvvəllər Çində yol testlərində görünmüşdü. Avtomobil Xpeng-in Kunpeng Super Elektrik Sistemindən istifadə edəcək. Bu sistem yalnız elektrik rejimində 430 kilometrə qədər məsafə təklif edir. 800V batareya paketi ilə təchiz olunmuş G01, 5C şarj texnologiyası sayəsində cəmi 12 dəqiqədə 10%-dən 80%-ə qədər şarj oluna bilir. Modelin təxminən 54700 dollara satışa çıxarılacağı gözlənilir.