Tramp Apple-a əlavə vergi qoyacaq?

ABŞ prezidenti Donald Trampın Apple şirkətinin iPhone istehsalını Hindistana köçürmək planlarına qarşı sərt bəyanatı səsləndi. Tramp, əgər Apple istehsalı ABŞ-a köçürməzsə, şirkətə 25% gömrük rüsumu tətbiq edəcəyini açıqlayıb. Bu açıqlama Trampın Truth Social hesabında yer alıb.

Tramp öz paylaşımında Apple-ın baş direktoru Tim Kukla uzun müddət əvvəl gözləntilərini çatdırdığını bildirib: "Ona bildirdim ki, iPhone-ların ABŞ-da, Hindistan və ya başqa yerdə deyil, ABŞ-da istehsal olunmasını gözləyirəm". Tramp əlavə edib ki, əgər bu gözlənti yerinə yetirilməzsə, Apple ABŞ-a 25% gömrük rüsumu ödəməli olacaq.

Son günlərdə Apple-ın Hindistandakı istehsal planları daha aydınlaşdı. Məqsəd, ABŞ bazarına tədarük olunan bütün iPhone-ların Hindistan tərəfindən təmin olunmasıdır. Şirkətin əsas istehsalçısı Foxconn, Hindistanın Çennai şəhərində 1,5 milyard dollarlıq zavod qurur. Bildirilib ki, bu zavod iPhone ekranlarının istehsalında istifadə olunacaq.

COVID-19 pandemiyasının təsirləri və Çinlə ticarət gərginliyi səbəbindən Apple istehsalını diversifikasiya etməyə çalışır və Hindistan bu strategiyasının əsas sütunlarından birinə çevrilib. Şirkətin uzunmüddətli planlarına əsasən, gələn illərdə dünyada satılan iPhone-ların təxminən 25%-nin Hindistanda istehsal olunması gözlənilir. Apple gələn dörd il ərzində ABŞ-a 500 milyard dollar investisiya yatıracağına söz versə də, iPhone istehsalının tamamilə ABŞ-a köçürülməsi çətin görünür.