Tom Kruzla "Top Qan" filminin üçüncü hissəsi yaxındır!

1986-cı ildəki tarixi "Top Qan" filmi ilə əfsanəyə çevrilən və 2022-ci ildə "Top Qan: Məverik" filminin dünya miqyasında böyük uğuru ilə yenidən zirvəyə qayıdan seriya, üçüncü hissəsi ilə davam edəcək.

“Məverik” filminin 1.49 milyard dollarlıq kassadakı gəliri, yalnız pərəstişkarlar arasında deyil, həm də istehsalçılar arasında üçüncü film üçün möhkəm bir zəmin yaratdı. Artıq bir müddətdir gündəmdə olan "Top Qan 3" üçün konkret addımlar atılmağa başlanılıb.

Son dörd "Missiya: Mümkünsüz" filminin ssenarisini yazan və rejissorluğu edən, həmçinin "Top Qan: Məverik" filminin ssenari qrupunda yer alan Kristofer Makvori, bu həftə qatıldığı bir podkast proqramında "Top Qan 3" filminin ssenarisinin tamamlandığını açıqlayıb. Makvori yeni hekayənin yaradılmasının gözlədiyindən daha asan olduğunu və seriyaya necə davam ediləcəyini aydın şəkildə müəyyənləşdirdiklərini bildirib.

Tom Kruz və Kristofer Makvorinin birgə formalaşdırdığı hekayə, sadəcə bir şayiə səviyyəsindən istehsal prosesinə yaxınlaşıb. Rəsmi çəkiliş cədvəli hələ açıqlanmasa da, ssenarinin tamamlanması bu prosesin tezliklə başlayacağını göstərir. Tom Kruzun yenidən baş rolunu oynayacağı filmdə, "Top Qan: Məverik"də tanıdılan gənc pilot personajları da geri dönür. Mayls Teller və Qlen Pauell seriyada yeni nəsil nümayəndələri kimi hekayəni davam etdirəcəklər.

“Məverik”dəki rejissorluğu ilə tərif alan Cozef Kosinski, yenidən rejissor kürsüsündə olacaq. Lakin yeni film və onun mümkün buraxılış tarixi ilə bağlı detallar hələ açıqlanmayıb.