Threads-də Reklam Dövrü Başlayır

İnstaqram komandası tərəfindən yaradılan və idarə olunan Threads platforması əhəmiyyətli bir addım atıb. Başlanğıcdan etibarən tamamilə reklamdan azad olan platforma indi istifadəçilərin xəbər lentində reklamlar göstərməyə başlayacaq. Meta sosial şəbəkədə reklamın ilkin testinin başlandığını rəsmi olaraq elan edib.

Keçən il noyabr ayında Meta platformanın tezliklə reklamlar göstərməyə başlayacağını bildirmişdi. Şirkət bu bəyanatının ardınca tez bir zamanda hərəkətə keçərək ABŞ və Yaponiya kimi seçilmiş ölkələrdə reklamı aktivləşdirib. İnstaqramın rəhbəri Adam Mosseri, reklamların "ABŞ və Yaponiyadakı bir neçə marka ilə" yayımlanmağa başlayacağını açıqlayıb.

X sosial media platformasında olduğu kimi, reklamlar da xəbər lentində yazılar arasında şəkil kimi görünəcək. Yeni reklamları hədəfləmək üçün Meta, istifadəçilərin Threads və İnstaqramdakı fəaliyyətindən istifadə edərək, maraqlandıqları məzmuna, e-poçt ünvanlarına və "Meta texnologiyaları xaricindəki fəaliyyətlərinə" əsasən tövsiyələr verəcək.

Şirkət bəyanatında əlavə edib ki, digər regionlara genişləndirmədən əvvəl ilkin testləri izləyəcək. Həmçinin, istifadəçilərin Hesab Mərkəzindən gördükləri reklamları fərdiləşdirə biləcəkləri və reklamları keçmək, gizlətmək və bildirmək seçimlərinin olacağı da bildirilib.

Reklamlardan əlavə, Meta-nın sosial şəbəkəsi son zamanlar yazıları planlaşdırmaq üçün yeni imkanlar əldə edib. Eyni zamanda, son mənbələr Meta-nın artıq Threads üçün "Community Notes" (İcmə Qeydləri) xüsusiyyəti üzərində işlədiyini iddia edir.