Süni İntellekt Yarışında Böyük Dəyişiklik: Google Gemini ChatGPT-nin Bazar Payını İki Dəfə Artırdı

Süni intellekt (Sİ) inqilabını başladan və uzun müddət bazarda tək lider sayılan ChatGPT, son dövrlərdə rəqiblərinin qarşısında bazar payını ciddi şəkildə itirməyə başlayıb. Bu müddətdə ən diqqətçəkən irəliləyişi isə Google Gemini əldə edib. SimilarWeb tərəfindən yayımlanan son trafik analizləri göstərir ki, Google Gemini bir il ərzində bazar payını iki dəfə artıraraq əhəmiyyətli bir yüksəliş tempinə çatıb.

Keçən il generativ süni intellekt alətlərinə daxil olan ümumi trafikin yalnız 6.4 faizini təşkil edən Gemini, bu gün bu nisbəti 12.9 faizə çatdırıb. Əksinə, eyni dövrdə ChatGPT-nin bazar payı 87.1 faizdən 74.1 faizə düşüb. Baxmayaraq ki, OpenAI-nin aləti həftəlik 700-800 milyon istifadəçisi ilə hələ də sənaye lideri olaraq qalır, rəqiblə aradakı fərqin bu qədər sürətlə bağlanması bazar üçün böyük maraq kəsb edir. İnvestor Chamath Palihapitiya bu vəziyyəti qiymətləndirərək, bu yarışda güclü paylama qabiliyyətinə malik texnologiya nəhənglərinin həlledici rol oynayacağını düşünür. O qeyd edir ki, Google kimi şirkətlər mövcud ekosistemlərindən istifadə edərək uzunmüddətli dövrdə daha sürətli böyüməyə nail ola bilərlər.

Gemini-nin bu sürətli yüksəlişinin əsas səbəbi onun yeni təqdim etdiyi vizual redaktə aləti olan Nano Banana-dır. Bu xüsusi funksiya istifadəçilərə şəkillər yaratmağa və onları redaktə etməyə imkan verir. Nano Banana ilkin istifadəyə verildiyi zaman sosial mediada böyük səs-küy yaratdı və Gemin-yə çox sayda yeni istifadəçi cəlb etdi. Bu alətin avqust ayında təqdim edilməsindən sonra, iyulun sonu ilə müqayisədə Gemini tətbiqinin yüklənmələri 331 faiz artıb. Təkcə ABŞ bazarında isə sentyabr və oktyabr ayları arasında 88 faizlik böyük artım qeydə alınıb.

Gemini-nin bazar gücü yalnız ChatGPT-yə təsir etmədi, həm də digər vizual alətlər üçün də rəqabəti çətinləşdirdi. Məsələn, eyni dövrdə Adobe Firefly-ın yüklənmələri 68 ilə 82 faiz arasında azaldı. Bu cür sürətli yüksəlişdən sonra Gemini, iOS-da ən çox yüklənən pulsuz tətbiqlər siyahısında ChatGPT-ni geridə qoymağı bacarıb. Baxmayaraq ki, yarışda hələ də ChatGPT liderlik mövqeyini qoruyur, aydın görünür ki, generativ süni intellekt bazarında "tək tərəfli üstünlük dövrü" sona çatıb və yaxın gələcəkdə daha sərt rəqabət gözlənilir.