Samsung Yeni Batareya Texnologiyaları Üstündə İşləyir!

Samsung smartfonlarında daha uzun istifadə müddəti təmin etmək üçün iki yeni batareya texnologiyası üzərində işini intensivləşdirib. Şirkətin bu sahədəki addımları batareya performansındakı durğunluğu aradan qaldırmaq üçün uzunmüddətli strategiya kimi dəyərləndirilir. Samsung yeni batareya texnologiyalarının dizaynına başlayıb. Smartfonların prosessor gücü, ekran texnologiyaları və proqram təminatı imkanları hər il inkişaf etsə də, batareya ömründə eyni sürətdə irəliləyiş müşahidə olunmayıb. Xüsusilə nazik və yüngül dizayna malik qurğularda batareya tutumu ilə qurğunun qalınlığı arasındakı tarazlığı tapmaq istehsalçılar üçün əsas problemə çevrilib.

Bu məqamda Samsung fərqli istehsalçıların seçdiyi yoldan fərqli bir strategiya izləməyə başlayıb. Çin istehsalçıları Oppo, Vivo, Honor və Xiaomi silikon-karbon batareyalarla qurğuların ölçüsünü kiçiltməyi və tutumunu artırmağı hədəfləyirlər. Lakin silikon şarj zamanı genişlənməyə meylli olduğundan, uzun müddətdə batareyanın sağlamlığını mənfi təsir edə bilər. Samsung isə bu üsula ehtiyatla yanaşır. Sızdırılan məlumata görə, şirkət əvəzinə bərk halda olan və inkişaf etmiş litium-ion batareyalara fokuslanıb. Bərk halda olan batareyalar maye elektrolitlər əvəzinə bərk elektrolitlər istifadə etməklə daha təhlükəsiz və uzunömürlü quruluş təklif edir. İnkişaf etmiş litium-ion sistemləri isə həm enerji sıxlığını artırmaq, həm də batareya ömrünü uzatmaqla mövcud texnologiyanın limitlərini aşmağı hədəfləyir. Ancaq hər iki texnologiyanın da hələ kommersiyalaşma mərhələsinə çatmadığı bildirilir. Məhsulların nə zaman son istifadəçiyə çatacağı hazırda aydın deyil.

Samsungun batareya istehsalındakı prioriteti təhlükəsizlikdir. Şirkət keçmişdə baş vermiş Galaxy Note 7 batareya böhranından sonra bu sahədə çox ehtiyatlı davranır. Yeni batareya texnologiyaları bazara çıxmazdan əvvəl uzunmüddətli davamlılıq və təhlükəsizlik testlərinə məruz qalacaq.