Samsung Ev Texnikasına One UI Gətirir!

Artıq smartfon və planşetlərdə alışdığımız One UI interfeysi ev texnikasında da istifadə ediləcək. Samsungun bu günki elanına görə, smart ev cihazlarından soyuducu və paltaryuyan maşınlara qədər bütün ağıllı məhsullarına One UI proqram təminatı dəstəyi əlavə olunacaq.

Texnologiya nəhəngi, istifadəçi dostu məhsullar yaratmaqla yanaşı, Huawei kimi şirkətlərdən tanıdığımız təcrübəni təklif edərək, ağıllı cihazlar üçün vahid interfeysə keçid edir. Elanda qeyd edildiyi kimi, Samsung One UI dəstəyi ilə vahid interfeysə keçəcək və 2024-cü ildə təqdim olunacaq Wi-Fi dəstəkli cihazlar üçün 7 il ərzində yeniləmə vəd edir.

Smartfon, planşet və ağıllı saatlardan bəzi xüsusiyyətləri ilə One UI interfeysi indi mətbəx texnikasına da gətirilir. Bixby, Qalereya və Samsung TV Plus kimi tətbiqlər və xidmətlər də bu cihazlarda mövcud olacaq. SmartThings inteqrasiyası cihazların bir-birinə qoşulmasını daha da asanlaşdıracaq.

One UI 7 ilə təqdim olunan yeni Brief xüsusiyyəti ailə üzvlərinə faydalı və kontekstli məlumatlar təqdim edəcək. Bu xüsusiyyət gündəlik hava proqnozları, ailə təqvimləri, fərdi reseptlər və ev məlumatları təklif edəcək. Məsələn, paltaryuyan maşının işinin bitmə vaxtını soyuducu qapısından görə biləcəksiniz. Bu yeni xüsusiyyətin ən yaxşı cəhətlərindən biri də One UI sayəsində Knox Security vasitəsilə əşyalarınız üçün daha yaxşı təhlükəsizlik təmin etməsidir.

2024-cü ilə qədər buraxılacaq bütün Wi-Fi dəstəkli cihazlar Trust Chain adlı özəl blokkeyn texnologiyası ilə qorunacaq. Bu texnologiya cihazlar arasında təhlükəsiz əlaqə yaradacaq və təhlükəsizlik pozuntusu baş verərsə, bir-birinin təhlükəsizlik statusunu izləyəcək.