OpenAI Microsoft-la əməkdaşlığını dəyişir

OpenAI, Microsoft ilə gəlir paylaşımı müqaviləsində köklü dəyişikliyə gedir. Son məlumata görə, şirkət 2030-cu ilədək Microsoft-a ödənişləri hazırkı səviyyənin yarısına endirməyi planlaşdırır.

Hazırkı müqaviləyə əsasən, 2030-cu ilədək əldə edilən gəlirin 20 faizi Microsoft-a ödənilirdi. Lakin, şirkətin son açıqlamalarında bu nisbətin 10 faizə endiriləcəyi bildirilib. Planlaşdırılan dəyişikliyin yalnız Microsoft deyil, digər kommersiya tərəfdaşlarını da əhatə edəcəyi qeyd olunub.

Bu qərar OpenAI-nin yenidən qurulma prosesi çərçivəsində qəbul edilib. Şirkət son aylarda baş direktor Sam Altmanın təsirini artıran yeni bir struktur elan etsə də, bu strukturun bəzi elementlərindən geri çəkilmişdir. Yanvar ayında Microsoft və OpenAI arasındakı əməkdaşlıq daha çevik hala gətirilmiş, müqavilənin bəzi əsas maddələri yenidən nəzərdən keçirilmiş və gəlir paylaşımı qarşılıqlı bir quruluşa gətirilmişdir.

Bu tənzimləmələr, Oracle və Yaponiyanın SoftBank şirkətləri ilə birgə, 500 milyard dollara qədər çata biləcək süni intellekt məlumat mərkəzi layihəsi ilə eyni vaxtda həyata keçirilmişdir. OpenAI-nin rəsmi açıqlamasında Microsoft ilə əməkdaşlığın davam etdiyi və kapital strukturundakı dəyişikliklərin tezliklə aydınlaşdırılacağı bildirilib. Microsoft hələ OpenAI tərəfindən təklif olunan yeni korporativ quruluşu təsdiq etməyib. Bloomberg agentliyinin məlumatına görə, şirkət yeni strukturda maraqlarının qorunduğundan əmin olmaq üçün qiymətləndirmələrini davam etdirir.