Nissan Renaultdan Uzaqlaşır

Yaponiyanın Nissan şirkəti, Fransa avtomobil istehsalçısı Renaultdakı payını azaltmağa hazırlaşır. Bu addım, şirkətin son illərdə Çin və Şimali Amerika kimi əsas bazarlarda gözlənilən satış göstəricilərinə çatmaması və 2024 maliyyə ilini itki ilə bağlaması ilə əlaqədardır.
Nissan, Renaultdakı təxminən 640 milyon dollarlıq payını sataraq əldə edəcəyi vəsaitləri yeni avtomobil modellərinin inkişafına yönəltməyi planlaşdırır. Bu barədə Nikkei qəzetinə şirkətin baş direktoru İvan Espinosanın açıqlaması verilib. 9000 işçinin ixtisarı və istehsal gücünün 20% azaldılması ilə yanaşı, bu qərar, Nissanın uzun illərdir davam edən Renaultla strateji tərəfdaşlığından tədricən uzaqlaşmaq strategiyasının bir hissəsi kimi də qiymətləndirilir.

Qeyd edək ki, 2024-cü ilin son rübündə Nissan, Honda və Mitsubishi arasında mümkün olan mega birləşmə danışıqları aparılırdı. Bu birgəlik dünyanın üçüncü ən böyük avtomobil qrupunu yarada bilərdi. Lakin, 2025-ci ilin əvvəlində Honda şirkətinin Nissanı öz törəmə şirkətinə çevirmək şərti səbəbindən danışıqlar dayandırıldı. Ancaq tərəflər arasındakı əlaqələr tam olaraq kəsilməyib. Daxili mənbələrə görə, Honda ilə əməkdaşlıq yenidən gündəmə gələ bilər. Yeni baş direktor İvan Espinosanın vəzifəyə başlaması ilə belə strateji əməkdaşlıqlar yenidən müzakirə olunacaq.