MSI-dən oyunçular üçün super keyfiyyətli monitor!

MSI şirkəti oyun həvəskarlarını heyran edəcək yeni monitorunu təqdim etdi. MAG 272UP QD-OLED X24 adı ilə satışa çıxarılan monitor, Samsung-un dördüncü nəsil QD-OLED panelinə əsaslanır. 26.5 düymlük ekran, 3840 x 2160 piksel çözünürlüyü və 240 Hz yenilənmə tezliyi ilə diqqət çəkir.

Təxminən 776 dollar qiymətə satılan monitor, öz işıq saçan pikselləri sayəsində 1.500.000:1 kontrast nisbəti təklif edir. DisplayHDR True Black 400 sertifikatı isə dərin qara rəngləri və yüksək dinamik diapazonu təmin edir. 0.03 millisaniyəlik cavab müddəti və NVIDIA G-Sync dəstəyi sayəsində oyunlarda minimal gecikmə təmin olunur.

MAG 272UP QD-OLED X24 yalnız oyunçular üçün deyil, həm də rəng dəqiqliyinə ehtiyac duyan peşəkarlar üçün nəzərdə tutulub. Monitor zavoddan kalibrlənmiş halda satışa çıxarılır. 99% DCI-P3, 98% Adobe RGB və 138% sRGB rəng gamutunu dəstəkləyir, 10 bit rəng dərinliyi və Delta E ≤2 dəyəri əldə edilir.

OLED panellərində zamanla baş verə biləcək ekran yanmasına qarşı OLED Care 2.0 sistemi aktivdir. Bu sistem piksel sürüşdürülməsi, avtomatik parlaqlıq idarəetməsi və ətraf mühitə uyğun işıq optimallaşdırması kimi funksiyalara malikdir. Bağlantı tərəfindən isə 2 HDMI 2.1, 1 DisplayPort 1.4a, USB-C və qulaqlıq çıxışı mövcuddur.