Microsoft-un "Kopaylot" Süni İntellekt Botu Yanvarın 15-də "Vatsap"dan Çıxarılır

Microsoft şirkəti rəsmi olaraq elan edib ki, onun süni intellekt çatbotu "Kopaylot" (Copilot) yanvarın 15-dən sonra "Vatsap" (WhatsApp) platformasında fəaliyyət göstərməyəcək. Bu tarixdən sonra AI köməkçisindən istifadə etmək istəyən istifadəçilər mütləq "Microsoft"un xüsusi mobil tətbiqlərinə keçməli və ya botu rəsmi veb sayt vasitəsilə işə salmalıdırlar. Bu qərar məşhur mesajlaşma xidmətində "Kopaylot"la əlaqə qurma tərzini dəyişir və istifadəçiləri alternativ platformalara yönləndirir.

Şirkət bu addımı "Meta"ya məxsus mesajlaşma platformasının yenilənmiş qaydalarına əməl etmək məqsədilə atdığını izah edib. "Vatsap"ın keçən ay elan etdiyi yeni platforma siyasətlərinə görə, platforma artıq ümumi təyinatlı süni intellekt çatbotlarının "WhatsApp Business API"sindən istifadəsini dəstəkləməyəcək. "Vatsap" bunun əvəzinə, bu resursları sırf öz müştərilərinə xidmət göstərmək üçün AI alətlərindən istifadə edən müəssisələr üçün ayırmağı planlaşdırır. Bu dəyişiklik bizneslərin müştəri xidmətlərində AI-dan istifadə etməsinə qadağa qoymasa da, "Vatsap"ın "Microsoft", "OpenAI" və "Perplexity" kimi şirkətlərin AI çatbotlarını paylama kanalı olmasına son qoyur.

Bu siyasət dəyişikliyi səbəbindən "OpenAI" şirkəti də öz "Vatsap" inteqrasiyasını yanvar ayında dayandıracağını əvvəlcədən bildirmişdi. "Vatsap"da "Kopaylot"u işlədən istifadəçilər üçün vacib bir məqam isə onların yazışma tarixçəsinin qorunmamasıdır. "Microsoft" xəbərdarlıq edir ki, "Vatsap" üzərindən çatbota giriş qeyri-təsdiqlənmiş (unauthenticated) olduğu üçün, istifadəçilər rəsmi "Microsoft" platformasına keçdikdə köhnə söhbətlər saxlanılmayacaq. Əgər istifadəçilər keçmiş söhbətlərini gələcək istinad üçün saxlamaq istəyirlərsə, yanvarın 15-dək "Vatsap"ın daxili ixrac funksiyalarını istifadə etmələri tövsiyə olunur.