Küçə işıq dirəkləri artıq elektrik avtomobil şarj stansiyasına çevrilir

Elektrikli avtomobillərin sayının sürətlə artması ilə yanaşı, şəhər mərkəzlərində yaşayan sürücülər üçün şarj infrastrukturunun olmaması ciddi problem olaraq qalır. Xüsusilə də, mənzildə yaşayan avtomobil sahibləri evdə şarj imkanlarını tapmaqda çətinlik çəkirlər. Mənzil qarajlarında şarj qurğuları quraşdırmaq texniki cəhətdən mümkün olsa da, praktikada bina idarəetməsi ilə mübahisələr, istifadəçi sayının azlığı və ümumi xərclərlə bağlı mübahisələr bu prosesi ləngidir. Bu vəziyyət bir çox sürücünü avtomobillərini küçənin kənarında park etməyə məcbur edir.

Bu problemi həll etmək üçün ABŞ-da yerləşən Voltpost şirkətinin hazırladığı sistem diqqət çəkir. Voltpost sistemi mövcud küçə işıq dirəklərini şarj stansiyalarına çevirir. Şarj modulunun dirəklərin altına quraşdırılması sayəsində bu çevrilmə əlavə səkil sahəsinin tutulması olmadan baş verir. Şirkət ilk kommersiya tətbiqini Miçiqan ştatının Detroyt şəhərinin Oak Park bölgəsində həyata keçirib. Bu quraşdırma, ştatın 2030-cu ilədək 100.000 şarj nöqtəsi qurmaq hədəfinə doğru atılan ilk addımlardan biri olaraq qeyd edilib.

Voltpost sistemində küçə işıq dirəkləri xüsusi örtüklə örtülür və şarj stansiyalarına çevrilir. Bu 2-ci səviyyəli qurğular maksimum 7.6 kVt güc verir ki, bu da təxminən saatda 45 kilometr məsafə qət etməyə imkan verir. Bu güc, gecə park edilən avtomobillər üçün xüsusilə kifayətdir. Hətta böyük batareyaya malik avtomobillər də səhərə qədər tam şarj oluna bilər. Nisbətən yavaş şarj sürəti digər istifadəçilər üçün yer yaratmaq məqsədilə gecənin ortasında avtomobilin yerini dəyişdirmək zərurətini aradan qaldırır. Eyni şey gündüz iş yerləri üçün də keçərlidir; səhər buraxılan avtomobil axşam növbəsinin sonunda tam şarj edilmiş halda götürülə bilər.

Sistemin kabeli qurğuya daxil edilib və avtomatik olaraq geri çəkilir, istifadəçilərin naqilləri baqajdan çıxarmasına və ya küçədə düzəltməsinə ehtiyac qalmır. Dirək başına bir neçə yuva quraşdırıla bilər; bəzi dirəklər tək şarj tutumuna, digərləri isə ikiqat və ya dördqat şarj tutumuna malikdir. Qurğular xarici amillərə yüksək müqavimət göstərərək istehsal olunur. Anodlaşdırılmış alüminiumdan hazırlanan sistem -40°C-dən 55°C-yə qədər temperaturda və yüksək rütubət şəraitində fasiləsiz işləyə bilir. Həmçinin zərbələrə və xarici müdaxilələrə qarşı qorunur.

Voltpost sisteminə bənzər bir sistem Azərbaycanda da tətbiq oluna bilər. Xüsusilə Bakı kimi sıx yaşayışlı ərazilərdə, avtomobil sayının çox olduğu yerlərdə mövcud küçə işıqları və ya yol kənarı dayanacaq sahələri bu çevrilmə üçün əlverişli zəmin yaradır.