Fransa öz robot ordusu yaratmaq istəyir

Süni intellekt və robot texnologiyalarındakı sürətli inkişaf, müdafiə sahəsində yeni bir dövrün qapılarını açır. ABŞ və Çindən sonra Fransa da öz robot ordusunu yaratmaq üçün konkret addımlar atmağa başlayıb.

Fransanın bu sahədəki hədəfi yeni deyil. Robot ordusu konsepsiyası ölkədə ilk dəfə 2021-ci ildə gündəmə gətirilmiş və 2040-cı ilədək əhatəli bir robot hərbi qüvvəsinin yaradılması planlaşdırılmışdı. Lakin, Fransa Ordusunda xidmət edən general Bruno Baratzın sözlərinə görə, bu hədəfə gözləniləndən xeyli əvvəl nail olmaq mümkündür.

Fransadakı hərbi bazalarda aparılan sınaqlarda müxtəlif növ robotlar sınanır. Bunlara humanoid robotlar, təkərli maşınlar və dron formalı sistemlər daxildir. Bildirilib ki, robotlar əvvəlcə kəşfiyyat missiyaları, mina təmizlənməsi və texniki təmir kimi sahələrdə istifadə olunacaq. Ancaq süni intellekt mütəxəssislərinin qiymətləndirmələri göstərir ki, bu sistemlərin birbaşa toqquşmalarda iştirakı qaçılmazdır.

Fransa Ordusunun başqa bir generalı Toni Maffeis isə deyib: "Robotların düşmənlə təmasda olduqda daha effektiv ola biləcəyini sübut etməliyik. Robotlar müharibəni asanlaşdırmalı, əngəlləməməlidirlər.” Fransanın robot ordusu planı bir daha müstəqil silah sistemlərinə qlobal marağı gündəmə gətirib. Bu inkişaf göstərir ki, döyüş meydanında insan faktorunu minimuma endirməyə yönəlmiş müstəqil və süni intellekt dəstəkli sistemlər gələn dövrdə getdikcə daha çox yer alacaq.