Fiat-dan sürətli batareya dəyişdirmə texnologiyası!

Avtomobil sektorunda elektrikləşmə sürətlə yayılsa da, şarj müddəti və infrastruktur kimi əsas problemlərə alternativ həllər üzərində işlər davam edir. Bu sahədə ən diqqət çəkən addımlardan biri də Fiat şirkətindən gəldi. Şirkət, İspaniyanın paytaxtı Madrid şəhərində elektrik avtomobillərində batareya dəyişdirmə texnologiyasını əhatə edən pilot layihəyə başladı.

Layihə çərçivəsində Fiat-ın tam elektrikli modeli 500e istifadə olunur. Sınaq filosu, batareya dəyişdirmə texnologiyaları üzərində çalışan Ample şirkəti tərəfindən hazırlanmış xüsusi sistemlə təchiz edilib. Bu sistem, boş batareyanın beş dəqiqə ərzində tam dolu batareya ilə əvəz olunmasına, ənənəvi şarj prosesini gözləmədən imkan verir. Bu texnologiya əvvəllər Çin şirkəti Nio tərəfindən oxşar şəkildə istifadə edilib və batareya istehsalçısı CATL müxtəlif markalar üçün bu həllin standartlaşdırılması üzərində işləyir.

Madriddə həyata keçirilən pilot layihədə 40 Fiat 500e avtomobilindən ibarət filodan istifadə olunur və şəhər şəraitində aktiv şəkildə sınaqdan keçirilir. Bu filoya Stellantis-in avtomobil paylaşımı brendi Free2Move tərəfindən idarə olunur. Avtomobillərdə istifadə olunan batareya sisteminin texniki detalları açıqlanmasa da, dəyişdirmə prosesi qısa və əməliyyat baxımından əlverişli görünür. Hazırda layihədə yalnız bir batareya dəyişdirmə stansiyası mövcuddur. Lakin, bu infrastrukturun genişləndirilməsi istiqamətində tədbirlər görülüb. İspan hökumətinin verdiyi 9,8 milyon avroluq dəstəklə yeni stansiyaların qurulması planlaşdırılır. Eyni zamanda, sınaq filosunun 100 avtomobilə qədər artırılması hədəflənir.

Sistem hal-hazırda yalnız Fiat 500e modelində sınaqdan keçirilir. Bu model, Stellantis brendi altında digər markaların istifadə etdiyi ümumi e-CMP elektrik platformasından fərqli olaraq, unikal bir infrastruktur üzərində qurulub. Buna görə də, hazırlanmış batareya dəyişdirmə sisteminin qrup daxilində digər avtomobillərə nə vaxt və necə inteqrasiya olunacağı hazırda aydın deyil.