Elektrikli Maşınlar üçün Robotlu Şarj Sistemi Hazırdır!

Hyundai və Kia şirkətləri Cənubi Koreyada, xüsusilə İnçxon Beynəlxalq Hava Limanında, elektrikli avtomobillərin şarj prosesini avtomatlaşdıran yeni bir robot sistemini təqdim ediblər. Bu sistem, şarj kabelini avtomatik olaraq maşına qoşub çıxaran tək qollu bir robotdan istifadə edir.

Maşın dayananda robot avtomatik olaraq şarj portu açır və kabeli təhlükəsiz şəkildə bağlayır. Şarj prosesi başa çatdıqdan sonra, sistem kabeli çıxarır, portu bağlayır. Robotun daxili kamerası vasitəsilə maşının şarj portunun yerini və bucağını hesablayır.

3D kamera əsaslı süni intellekt tərəfindən idarə olunan texnologiya, park yeri, port quruluşu, hava şəraiti, maneələr və kabel çəkisi kimi bir çox amili eyni zamanda təhlil edir. Sistemə inteqrasiya olunmuş lazer sensoru da ətrafdakı maneələri aşkarlayaraq toqquşmaların qarşısını alır.

Hyundai və Kia bu sistemi İnçxon Beynəlxalq Hava Limanı ilə əməkdaşlıq çərçivəsində qurublar. 2026-cı ilədək 1110 şarj vahidinə çatmağı planlaşdıran hava limanı rəhbərliyi, elektrik xidmət avtomobillərinin bu robotlar vasitəsilə şarj olunmasını nəzərdə tutur. Sistem əməkdaşların rəyləri əsasında inkişaf etdiriləcək.

Hyundai və Kia bu avtomatik şarj texnologiyasını gələcəkdə daha geniş sahələrə yaymağı planlaşdırır.